ءماجىلىس ءتوراعاسى ەرلان قوشانوۆ «شيەۆرون» كورپوراسياسىنىڭ ەۋرازيالىق بولىمشەسىنىڭ باسقارۋشى ديرەكتورى دەرەك ماگنەسستى قابىلدادى. تاراپتار كومپانيا جۇمىسىنداعى وتاندىق ۇلەستى ارتتىرۋ جانە الەۋمەتتىك جوبالاردى جۇزەگە اسىرۋ جونىندە پىكىر الماستى.

ءماجىلىس سپيكەرى كورپوراسيا باسشىلىعىن قازاقستانداعى قىزمەتىنىڭ 30 جىلدىعىمەن قۇتتىقتاپ، «شيەۆرون» ەلىمىزدەگى ءىرى شەتەلدىك ينۆەستور ەكەنىن اتاپ ءوتتى.

ەرلان قوشانوۆ قازاقستان پرەزيدەنتىنىڭ، ۇكىمەت پەن پارلامەنتتىڭ باستى مىندەتى – ۇلتتىق مۇددەلەردىڭ ساقتالۋىن ەسكەرە وتىرىپ، شەتەلدىك ينۆەستورلار ءۇشىن قولايلى جاعداي جاساۋ ەكەنىن ايتتى. وسىعان بايلانىستى «شيەۆرون» كومپانياسىنا ءبىرقاتار ۇسىنىس بەردى. اتاپ ايتقاندا، اتموسفەراعا تارايتىن زياندى قالدىقتاردى ازايتۋ، مۇناي حيمياسىن دامىتۋ، مۇناي مەن گاز وڭدەۋدى كۇشەيتۋ.

قازاقستاندىق ۇلەستى ارتتىرۋعا باسا نازار اۋدارىپ، جەرگىلىكتى ءونىمدى ساتىپ الۋ ماڭىزدى. جەرگىلىكتى سەرۆيستىك كومپانيالاردى تارتۋ كەرەك. ءبىزدىڭ ەلىمىزدە دامىعان جانە باسەكەگە قابىلەتتى بيزنەس بار. ولار وزىق حالىقارالىق ستاندارتتار دەڭگەيىندە جۇمىس ىستەي الادى. بۇگىندە بۇل باعىتتا ءبىراز جۇمىس اتقارىلىپ جاتىر. دەگەنمەن، اۋقىمدى رەزەرۆتەر بار. بۇدان بارلىق تاراپ ۇتىلمايدى دەپ ويلايمىن، – دەدى ءماجىلىس سپيكەرى.

ەرلان قوشانوۆ جۋىرداعى سايلاۋ ناۋقانى كەزىندە دەپۋتاتتاردىڭ قازاقستاننىڭ باتىس وبلىستارىنداعى تۇرعىندارمەن وتكەن كەزدەسۋىندە كوتەرگەن تۇيتكىلدى ماسەلەلەرگە دە تولىعىراق توقتالدى. سونىڭ ءبىرى – اتىراۋ وبلىسىنىڭ دوسسور ەلدى مەكەنىندەگى جانە قۇلسارى قالاسىنداعى اپاتتى جاعدايداعى تۇرعىن ءۇي ماسەلەسى مەن حالىقتى الەۋمەتتىك قولداۋ. بۇدان بولەك، قازاقستاندىق جۇمىسشىلارعا لايىقتى جاعداي جاساپ، ءادىل ەڭبەكاقى تولەۋ، ۆاحتا مەرزىمىن قىسقارتۋ، جەرگىلىكتى كادرلاردى دايارلاۋدى كۇشەيتۋ ماسەلەسى دە كەڭىنەن قوزعالدى.

– بۇگىندە ەلىمىزدە مۇناي-گاز سالاسىندا بىلىكتى ماماندار جەتەرلىك. ءبىراز جەرلەسىمىز شەتەلدىڭ بەدەلدى وقۋ ورىندارىندا ءبىلىم الىپ، ترانسۇلتتىق كومپانيالاردا تاجىريبە جيناقتادى. وسىعان بايلانىستى جەرگىلىكتى ماماندارعا شەتەلدىك ارىپتەستەرمەن بىردەي جالاقى تولەپ، ولارعا سەنىم ارتۋلارىڭىزدى سۇرايمىز، – دەدى پالاتا ءتوراعاسى.

ءوز كەزەگىندە، دەرەك ماگنەسس كومپانيانىڭ ەڭ باستى رەسۋرسى ادام ەكەنىن اتاپ ءوتتى. ول جەرگىلىكتى كادرلاردى دامىتۋعا ينۆەستيسيا سالۋعا، سونداي-اق كومپانيا ورنالاسقان وسى ايماقتىڭ دامۋىنا قولداۋ كورسەتۋگە دايىن ەكەندىگىن ايتتى. ول ءماجىلىس ءتوراعاسىنا كومپانيانىڭ دەپۋتاتتار تاراپىنان ايتىلعان بارلىق ۇسىنىستارعا مۇقيات قارايتىنىن جەتكىزدى.

ءسوز سوڭىندا ەرلان قوشانوۆ «شيەۆرون» كومپانياسىنىڭ باسشىلىعىن جەرگىلىكتى تۇرعىنداردىڭ وزەكتى ماسەلەلەرىن شەشۋگە جانە ايماقتى دامىتۋعا بەلسەنە اتسالىسۋعا شاقىردى.

كەزدەسۋگە ءماجىلىس دەپۋتاتى ءادىل جۇبانوۆ (اتىراۋ وبلىسىنان)، ەدىل جاڭبىرشين (ماڭعىستاۋ وبلىسىنان) قاتىستى.

ءماجىلىستىڭ باسپا ءسوز قىزمەتى