قالا اكىمى ەربولات دوسايەۆ جۇمىس ساپارى بارىسىندا ازاماتتىق قورعانىس نىساندارىنا بارىپ، ءورت ءسوندىرۋ دەپوسىنىڭ قۇرىلىسىمەن تانىستى جانە قۇتقارۋشىلاردىڭ ءتۇرلى توتەنشە جاعدايلارعا دايىندىق دەڭگەيىن باعالادى.

قازىرگى ۋاقىتتا مەگاپوليستىڭ ورتكە قارسى قاۋىپسىزدىگىن تەك 19 ءورت ءسوندىرۋ بولىمشەسى قامتاماسىز ەتەدى. نورمالارعا سايكەس ءبىر ءورت ءسوندىرۋ دەپوسىنا قىزمەت كورسەتۋ راديۋسى 3 كم – دەن اسپاۋى ءتيىس. قالانىڭ ءوسۋىن، تۇرعىن ۇي-كوممۋنالدىق ينفراقۇرىلىمنىڭ دامۋىن، كولىك جۇكتەمەسىن جانە حالىق سانىنىڭ ۇلعايۋىن ەسكەرە وتىرىپ، الماتىدا بۇگىندە 15 ءورت ءسوندىرۋ دەپوسى جەتىسپەيدى. ءورت ءسوندىرۋ بولىمشەلەرىنىڭ تاپشىلىعى قۇتقارۋشىلاردىڭ توتەنشە جاعداي ورنىنا كەلۋ ۋاقىتىنا تىكەلەي اسەر ەتەدى. جۇمىس ساپارى بارىسىندا قالا باسشىسىنا بوستاندىق اۋدانى نۇر-الاتاۋ شاعىن اۋدانىندا سالىنىپ جاتقان ءورت ءسوندىرۋ دەپوسى تانىستىرىلدى. دەپو بەس شاعىن اۋداننىڭ («قازاقفيلم»، «الاتاۋ»، «نۇر-الاتاۋ»، «ەرمەنساي»، «كوكشوقى» - جالپى سانى 32 مىڭنان استام ادام، 94 كاسىپورىن) تۇرعىندارىن ورتتەن قورعاۋمەن قامتاماسىز ەتەدى جانە ءورت ورنىنا كەلۋ ۋاقىتىن ەداۋىر قىسقارتۋعا مۇمكىندىك بەرەدى. قالا باسشىسى ينجەنەرلىك جەلىلەردى جۇرگىزۋ ماسەلەلەرىن جەدەل شەشىپ، اعىمداعى جىلدىڭ جەلتوقسان ايىندا نىساندى پايدالانۋعا بەرۋدى تاپسىردى. الداعى جىلدارى تۇركسىب، بوستاندىق، ناۋرىزباي اۋداندارىندا تاعى ءۇش ءورت ءسوندىرۋ دەپوسىن سالۋ جوسپارلانۋدا.

توتەنشە جاعدايلار دەپارتامەنتى عيماراتىنىڭ اۋماعىندا ەربولات دوسايەۆقا ورتكە قارسى جانە اۆاريالىق-قۇتقارۋ تەحنيكاسى ۇسىنىلدى. بۇگىندە الماتى ءورت سوندىرۋشىلەرىنىڭ قاراماعىندا 183 ماشينا بار، ونىڭ ىشىندە ءورت ءسوندىرۋ اۆتوسيستەرنالارى، ءورت ءسوندىرۋ-قۇتقارۋ اۆتوموبيلدەرى، موتوسيكلدەر جانە ت. ب.

قالا باسشىسى ماتەريالدىق-تەحنيكالىق جاراقتاندىرۋدى جاقسارتۋ جانە قۇتقارۋشىلاردىڭ ۇتقىرلىعىن ارتتىرۋ ماقساتىندا قوسىمشا 10 اۆتوكولىك ساتىپ الۋعا قاراجات ءبولۋدى تاپسىردى. ەربولات دوسايەۆ بيىك عيماراتتاردىڭ جوعارعى قاباتتارىندا قۇتقارۋ وپەراسيالارىن جۇرگىزۋ ءۇشىن تەلەسكوپيالىق كوتەرگىشتەرى بار ءۇش ماشينانى ساتىپ الۋ ءراسىمىن جەدەلدەتۋدى مىندەتتەدى. قازىرگى ۋاقىتتا الماتىدا وسىنداي نەبارى ءۇش اۆتوموبيل عانا بار.

الماتى اكىمى سونداي-اق ق ر تجم «اپاتتار مەديسيناسى ورتالىعى» مامانداردىڭ ماتەريالدىق-تەحنيكالىق جابدىقتالۋىمەن تانىستى. ارنايى قىزمەتكە ءوز عيماراتى قاجەت. ەربولات دوسايەۆ قولايلى ۋچاسكەنى تاڭداعاننان كەيىن قاجەتتى وبەكتىنىڭ قۇرىلىسىنا قاراجات بولۋگە دايىن ەكەندىگىن ءبىلدىردى. ماتەريالدىق جاراقتاندىرۋدى جاقسارتۋ بارىسىندا الماتى اكىمى  مەديسينالىق قالدىقتاردى تازارتۋ ءۇشىن  قوسىمشا 5 پنيەۆماتيكالىق جابدىق ساتىپ الۋدى تاپسىردى.

قالا باسشىسىنا الماتى قالاسى تجد كريزيستىك جاعدايلارداعى باسقارۋ زالىنىڭ جۇمىسى كورسەتىلدى. ونىڭ بازاسىندا ءبىرقاتار سيفرلىق جوبالار، سونىڭ ىشىندە مورەندى كولدەردىڭ سەرپىندىلىگىن باعالاۋعا جانە سەل قۇبىلىستارىنان تۋىنداعان تج ءقاۋپىنىڭ دەڭگەيىن تومەندەتۋگە مۇمكىندىك بەرەتىن سەل قاۋىپتىلىگىنىڭ اۆتوماتتاندىرىلعان مونيتورينگى جۇيەسى ەنگىزىلدى.

الماتى اكىمى جەر سىلكىنىسى تۋرالى ەرتە حابارلاۋدىڭ اۆتوماتتاندىرىلعان جۇيەسىن ىسكە اسىرۋ جوباسىمەن تانىستى. جوبا 28 سەيسموستانسيا سالۋدى كوزدەيدى، ونىڭ 11ء-ى وتكەن جىلى پايدالانۋعا بەرىلدى، قالعان 17ء-سى اعىمداعى جىلى ىسكە قوسىلادى. ەسكەرتۋ جۇيەسى ۇستىمىزدەگى جىلدىڭ مامىر ايىندا «دارمەن» ءموبيلدى قوسىمشاسىمەن ۇندەستىرىلەدى، ول حالىقتى سەيسميكالىق قاۋىپ-قاتەر، داۋىلدى گيدرومەتەورولوگيالىق قۇبىلىستار تۋرالى ۋاقتىلى حاباردار ەتۋگە مۇمكىندىك بەرەدى جانە ت.ب. قالا باسشىسى جەر سىلكىنىسى تۋرالى دەرەكتەرمەن الماسۋ ءۇشىن قىرعىزستان قىزمەتتەرىمەن بەلسەندى ىنتىماقتاستىقتا جۇمىس جاساۋدى تاپسىردى. كەزدەسۋ بارىسىندا قالانىڭ 1100 كامەراسىنان بەينەنى شىعارۋعا قابىلەتتى جانە ورتتەردى انىقتاۋعا جانە قىزمەتتەرگە جەدەل ارەكەت ەتۋگە مۇمكىندىك بەرەتىن ۆيدەومونيتورينگ جۇيەسى  كورسەتىلدى.

الماتى اكىمى الاتاۋ اۋدانىنداعى №31 بوبەكجاي بازاسىندا ىقتيمال تج كەزىندە حالىقتى جيناۋ پۋنكتتەرىنىڭ ءبىرىنىڭ جۇمىسىمەن تانىستى، وندا تج كەزىندە زارداپ شەككەن حالىقتى ۋاقىتشا ورنالاستىرۋ ءۇشىن پالاتالى قالاشىق ورنالاستىرىلعان. ەربولات دوسايەۆ تج كەزىندە جيناۋ پۋنكتى تۇرعىنداردى قابىلداۋدى قامتاماسىز ەتۋ ءۇشىن قوسىمشا جاراقتاندىرۋدى تالاپ ەتەتىنىن اتاپ ءوتتى: حالىقتى جيناۋ پۋنكتتەرىن ماتەريالدىق قامتاماسىز ەتۋ بويىنشا ناقتى ستاندارتتاردى ەنگىزۋ، ونىڭ ىشىندە كۇزگى-قىسقى اۋا رايى جاعدايلارىنا بەيىمدەلگەن پالاتكالاردى ساتىپ الۋ قاجەت.

ەربولات دوسايەۆ الاتاۋ اۋدانىنداعى ازاماتتىق قورعانىس قۇرىلىستارىنىڭ بىرىنە باردى. شامامەن 50 جىل بۇرىن سالىنعان قورعانۋ ورنى 150 ادامعا ارنالعان. ستراتەگيالىق ماڭىزدى وبەكت اپاتتى جاعدايدا جانە پانالانۋشىلاردى قابىلداۋعا دايىن ەمەس.

ارالاۋ قورىتىندىسى بويىنشا ەربولات دوسايەۆ اۋدان اكىمدىگى مەملەكەتتىك اكتيۆتەر باسقارماسىمەن بىرلەسىپ ءبىر اي مەرزىمدە قورعانىس قۇرىلىستارىن كوممۋنالدىق مەنشىككە قايتارۋ جونىندە ۇسىنىستار ەنگىزۋدى تاپسىردى. سونداي-اق، قالا باسشىسى ىقتيمال تج جاعدايىندا حالىقتى تىركەۋ جانە قابىلداۋ بويىنشا ءبىرىڭعاي ستاندارتتاردى ازىرلەۋدى جانە بارلىق كوممۋنالدىق قىزمەتتەردىڭ دايىندىعىن تەكسەرۋ ءۇشىن اعىمداعى جىلدىڭ كۇزىندە تولىق كولەمدى وقۋ-جاتتىعۋلار وتكىزۋدى تاپسىردى.