پروكۋراتۋرا الدىندا اشتىق جاريالاعان قاماۋداعى جۋرناليست دۋمان مۇحاممەدكارىمنىڭ اكەسى الماز تىلەپوۆ دەنساۋلىعىنا بايلانىستى اشتىقتى توقتاتتى، دەپ جازادى ازاتتىق. 

ونىڭ ايتۋىنشا، سەيسەنبى كۇنى ونىڭ قان قىسىمى كوتەرىلىپ، جەدەل جاردەم كولىگى شاقىرتىلعان. اۋرۋحاناعا جەتكىزىلىپ، سيستەما قويىلعان. دارىگەرلەر وعان اشتىقتى جالعاستىرۋعا تىيىم سالعان.

الماز تىلەپوۆتىڭ سوزىنە قاراعاندا، 6 ماۋسىمدا ونى ىلە اۋداندىق پوليسيا ءبولىمىنىڭ باستىعى شاقىرىپ سويلەسكەن. پوليسيا بولىمىنەن شىققاننان كەيىن جاعدايى ناشارلاعان.

– نەگىزى پوليسيا بولىمىنە كىرمەي تۇرىپ تا ءبىرتۇرلى بولىپ تۇرعانمىن. كىرىپ شىققاننان كەيىن جاعدايىم مۇلدە ناشارلاپ كەتتى. پوليسيا ءبولىمىنىڭ باستىعى ۇلىمدى زاڭسىز ۇستاپ اكەتۋگە قاتىستى ءالى باعا بەرىلمەگەنىن ايتتى. ءالى تەكسەرىس جالعاسىپ جاتىر دەدى. مەن ولارعا "دۋماندى 30 كۇن تولىپ كەتپەسىن دەپ ادەيى 2 كۇنگە بوساتىپ، ودان كەيىن قايتادان قاماۋعا الدىڭدار" دەدىم. مۇنى وزدەرى دە مويىندايدى. دۋماندى بوساتۋ بويىنشا تالابىم جونىندە ولار 7 ماۋسىمدا دوڭگەلەك ۇستەل وتكىزەتىنىن ايتتى، – دەدى الماز تىلەپوۆ.

ونىڭ سوزىنشە، دوڭگەلەك ۇستەلگە اكىمدىك پەن پروكۋراتۋرا وكىلدەرى دە قاتىسپاق.

بۇعان دەيىن الماز تىلەپوۆ ۇلىن بوساتۋدى تالاپ ەتىپ، اشتىق جاريالاعان ەدى. ونىڭ دەنساۋلىعىنا الاڭداعان ۇلى دۋمان مۇحاممەدكارىم ادۆوكاتى ارقىلى اشتىقتى توقتاتۋدى سۇراعان.

جۋىردا سوت "بەيبىت جيىن وتكىزۋ ءتارتىبىن بۇزدى" دەپ ايىپتالعان جۋرناليست دۋمان مۇحامەدكارىمدى 25 تاۋلىككە قاماعان. بيلىكتى قاتاڭ سىناۋمەن تانىلعان جۋرناليست 1 مامىر كۇنگى وپپوزيسيا ميتينگىسى قارساڭىندا قامالىپ، يزولياتوردان 26 مامىردا عانا بوساپ شىققان ەدى. ناۋرىزداعى پارلامەنت سايلاۋىنان بەرى ول وسىمەن ءۇشىنشى رەت قامالىپ وتىر.