"ادىلدىك جولى" قوعامدىق بىرلەستىگىنىڭ اتقارۋشى ديرەكتورى ديدار سماعۇلوۆ اباي اۋدانىنداعى ورتتەن بولعان ادام شىعىنىن سىبايلاس جەمقورلىقپەن تىكەلەي بايلانىستىرىپ، بۇعان شقو اكىمىنىڭ مىندەتىن اتقارۋشى دانيال احمەتوۆتىڭ كىنالى ەكەنىن مالىمدەدى. 

"شىعىس قازاقستان وبلىسىنىڭ ورمان شارۋاشىلىعىنداعى جەمقورلىققا كىم كىنالى؟ پرەزيدەنت توتەنشە جاعدايلار ءمينيسترىن قىزمەتىنەن بوساتىپ، اباي اۋدانىنىڭ اكىمىنە سوگىس جاريالادى. ءيا، ۇرانحايەۆتىڭ وبلىستى باسقارىپ كەلە جاتقانىنا ءبىر جىل بولدى. ول مۇنداي ماڭىزدى سالانى رەتكە كەلتىرۋ كەرەك ەدى. ءبىراق ءبىز شىعىس قازاقستان وبلىسى بولىنگەنگە دەيىن بۇل ايماقتى توعىز جىل بۇرىن وكىلەتتىگى رەسمي تۇردە اياقتالعان زەينەتكەر احمەتوۆ باسقارعانىن (ايماقتى وسىنداي جاعدايعا جەتكىزگەنىن) ەستەن شىعارماۋمىز كەرەك" – دەدى سماعۇلوۆ الەۋمەتتىك جەلىدەگى پاراقشاسىندا.

سونىمەن قاتار، ول قايتىس بولعانداردىڭ ەشقانداي قورعانىس قۇرالدارى بولماعانىن مالىمدەدى. مەرت بولعاندار قورعانىس كوستيۋمدەرى مەن وتتەگى ماسكالارىنسىز، بىرەۋى ءجاي اياق كيىم كيىپ شىققانىن دا ايتتى.

"ءتىپتى، راسيالاردىڭ باتارەيالارى بولماعان. ولاردى ولىمگە ءوز اياعىمەن جىبەردىك. 2016 جىلدان باستاپ "سەمەي ورمانى" رەزەرۆاتىنا 5،3 ملرد تەڭگەدەن استام قاراجات ءبولىندى. بيىل  ورمان ورتىمەن كۇرەسۋ جونىندەگى اقپاراتتىق جۇيەنىڭ ۇزدىكسىز جانە تاۋلىك بويى جۇمىس ىستەۋىنە 12 ملن تەڭگە قاراستىرىلعان. فلەش-ديسكىلەر، كىلتتەر مەن تەلەفون ۇستاعىشتارىنا 7،5 ملن بولىنگەن. 22 مامىردا 484 مىڭعا 55 راديوقابىلداعىش باتارەيا ساتىپ الىنعان. ەگەر راسيالار جۇمىس ىستەسە، قازا تاپقاندارعا بىرەۋ جەلگە قاراي بەت العاندارىن ەسكەرتىپ ۇلگەرەر ەدى. الايدا جەمقورلىق ءبىزدى ءولتىرىپ جاتىر، ءبىز وسىعان ءۇنسىز قاراپ وتىرمىز. مەن باسشىلار حالىقتان كەشىرىم سۇرايدى (قازىرگى ەل باسشىسى حالىقتان كەشىرىم سۇراعان كەزى بولىپ پا ەدى) جانە پرەزيدەنت "بارلىق كىنالىلەر ءادىل جازالانادى" دەگەن ۋادەسىندە تۇرادى دەپ سەنەم. ولار احمەتوۆتى دە ۇمىتپايدى دەپ ۇمىتتەنەم" –  دەپ جازدى ديدار سماعۇلوۆ.

ەسكە سالا كەتەيىك، اباي وبلىسىندا بولعان ورمان ورتىنەن 14 ادام قازا تاۋىپ، ەلىمىزدە جالپىۇلتتىق ازا تۇتۋ كۇنى جاريالانعان ەدى. بۇگىن تاعى ءبىر ورمانشىنىڭ جوعالىپ كەتكەنى بەلگىلى بولىپ، ىزدەستىرۋ جۇمىستارى جۇرگىزىلىپ جاتىر.