قازاقستاندا 4 پايىزدىق جەڭىلدەتىلگەن اۆتوكرەديت باعدارلاماسى توقتاتىلادى. بۇل تۋرالى يندۋستريا جانە ينفراقۇرىلىمدىق دامۋ ءمينيسترى مارات قارابايەۆ مالىمدەدى.
جەڭىلدەتىلگەن اۆتوكرەديتكە بولىنگەن 100 ملرد تەڭگەدەن ريەۆولۆەرلىك جۇيە ارقىلى تۇسكەن قارجىنىڭ ءبارى قوعامدىق كولىكتەردى جاڭارتۋعا جۇمسالادى. ال 4 پايىزدىق جەڭىلدەتىلگەن اۆتوكرەديت باعدارلاماسىن قايتا جاڭارتۋ جوسپارلانىپ وتىر.
"قايتا جاڭارتۋ كەزىندە اۆتوكولىكتى كرەديتتەۋ باعىتىن اۆتوبۋستاردى نەسيەلەۋ باعىتىنا اۋىستىرامىز با دەگەن جوسپار بار. ەلىمىزدە قوعامدىق كولىكتەردىڭ كوبى توزعان. مىسالى قوستانايدا اۆتوبۋستاردىڭ 90 پايىزى، ورال، تالدىقورعاندا 70 پايىزى ەسكىرگەن. ءبىز باعدارلاما اياسىندا تۇسكەن اقشاعا قانشا ادام كولىك الا الادى، ەگەر ونىڭ ورنىنا اۆتوبۋستاردى قارجىلاندىرساق، تيىمدىلىگى قالاي، سونىڭ ءبارىن ەسەپتەدىك. ماسەلەن، قوعامدىق كولىكتەردى كۇنىنە 9 ملن 300 مىڭ قازاقستاندىق پايدالانادى ەكەن. سوندىقتان ءبىز اقشانى كوبىرەك اۆتوبۋستار ساتىپ الۋعا باعىتتايمىز دەپ وتىرمىز"، - دەدى قارابايەۆ اقوردا كۋلۋارىندا.
ايتۋىنشا، قاراپايىم حالىق نارىقتىق ستاۆكامەن كولىك الا الادى.
"ول جەردە ەكى باعدارلاما بار عوي. بىرىنشىسىنە كەزەڭ-كەزەڭمەن 82 ملرد تەڭگە ءبولىندى. ول ءقازىر ريەۆولۆەرلىك ءادىس بويىنشا ءوز الدىنا ىستەپ تۇر. 82 ملرد تەڭگە بويىنشا 10-15% باستاپقى جارنا، قاتەلەسپەسەم نەسيە مولشەرلەمەسى 5% بولعان. بۇل باعدارلاما ءارى قاراي جالعاسادى. ءبىراق ودان تۇسكەن اقشانى قايدا باعىتتايتىنىمىزدى قوسىمشا حابارلايمىز"، - دەپ ءتۇسىندىردى يندۋستريا ءمينيسترى.
پىكىر قالدىرۋ