"تيتانيك" كەمەسىنە ساياحات جاساماق بولعان "تيتان" باتيسكافىنىڭ سىنىقتارى سۋ استىنان شىعارىلدى. اقش جاعالاۋ كۇزەتىنىڭ مالىمدەۋىنشە، سىنىقتار اراسىنان ادام قالدىقتارى تابىلعان. 

“اقش مەديسينا ماماندارى باتيسكافتان تابىلعان ادام قالدىقتارىنا ساراپتاما جۇرگىزەدى”، – دەلىنگەن اقش جاعالاۋ كۇزەتىنىڭ مالىمەتىندە. 

باتيسكاف ساراپتا جۇمىستارى ءۇشىن كاناداعا جەتكىزىلگەن. 

ەسكە سالا كەتەيىك، 19 ماۋسىم كۇنى تيتانيككە ساياحات جاسايتىن باتيسكاف 5 جولاۋشىمەن بىرگە جوعالىپ كەتكەن بولاتىن. بورتتا ميللياردەر-زەرتتەۋشى حەميش حاردينگ، OceanGate كومپانياسىنىڭ باس ديرەكتورى، فرانسيانىڭ سۋ استى كەمەلەرىنىڭ بۇرىنعى جەتەكشىسى پول-انري نارجەولە، پاكىستاندىق كاسىپكەر شاحزادا داۆۋد پەن ونىڭ ۇلى سۇلەيمەن بولعان.

22 ماۋسىمدا باتيسكافتاعى وتتەگى قورى تاۋسىلعان. كەيىن ىزدەستىرۋ جۇمىستارى ناتيجەسىندە باتيسكاف سىنىقتارى تابىلىپ، اقش جاعالاۋ كۇزەتى سۋ استى اپپاراتىندا ىشكە باعىتتالعان جارىلىس بولعانىن حابارلاعان بولاتىن.