سەنات دەپۋتاتتارى "زاڭسىز يەمدەنىلگەن اكتيۆتەردى مەملەكەتكە قايتارۋ تۋرالى" زاڭدى ماقۇلدادى. زاڭ پرەزيدەنتكە جىبەرىلدى.
زاڭعا سايكەس، زاڭسىز بايىعان جەكە جانە زاڭدى تۇلعالاردىڭ رەەسترى جاسالادى. ءتىزىم جابىق بولادى. بۇرىنعى شەنەۋنىكتەر مەن مەملەكەتتىك ۇيىمداردىڭ ەكس-باسشىلارى دا، ولارمەن بايلانىستا بولعان بارلىق ادام كۇدىكتىلەر قاتارىنا كىرۋى مۇمكىن. مىسالى، جاقىن تۋىستارى، تانىستارى، كولىك جۇرگىزۋشىسى، ءتىپتى ءۇي قىزمەتشىسى دە كۇدىككە ءىلىنۋى ىقتيمال.
"زاڭسىز يەمدەنىلگەن اكتيۆتەردى قايتارۋ بويىنشا ارنايى مەملەكەتتىك قور جانە باسقارۋشى كومپانيا دا قۇرىلادى. ەلگە قايتارىلعان قاراجات قوردىڭ شوتىنا تۇسەدى. ال باسقارۋشى كومپانيانىڭ مىندەتى – زاڭسىز الىنعان مۇلىكتى ساتىپ، اقشاسىن ارنايى قورعا اۋدارۋ. باسقارۋشى كومپانيانىڭ جالعىز قۇرىلتايشىسى ۇكىمەت بولادى. قايتارىلعان اقشا قازاقستان حالقىنىڭ ءال-اۋقاتىن ارتتىرۋعا باعىتتالعان الەۋمەتتىك جانە ەكونوميكالىق جوبالاردى قارجىلاندىرۋعا جۇمسالادى"، دەپ ايتىلادى.
الايدا حالىققا بولىنگەن قاراجاتتى جىمقىرعان شەندىلەردىڭ بايلىعىن قايتارا الادى دەگەنگە كۇمانمەن قارايتىنداردىڭ سانى كوپ. اتالعان زاڭ جوباسى ەكىنشى وقىلىمدا قابىلدانعان. ەندى پرەزيدەنت قول قويعان سوڭ زاڭ كۇشىنە ەنەتىن بولادى.
پىكىر قالدىرۋ