الاياقتار سوڭعى كەزدە كەڭىنەن تاراعان ايلا-امالمەن زەينەتكەرلەردى الدايدى. تەلەفون شالىپ، جاقىن تۋىستارى جول-كولىك وقيعاسىن جاساعانىن ايتادى. ال ولاردى جاۋاپكەرشىلىكتەن قۇتقارۋ ءۇشىن اقشا تالاپ ەتەدى.

 

بۇگىندە التى قالادا 30-دان استام ادام ۇستالىپ، التاۋى قاماۋعا الىندى. باسىم بولىگى – اقشا الىپ كەتۋگە كەلگەن "كۋرەرلەر". ولاردىڭ ىشىندە "ياندەكس تاكسي" جۇرگىزۋشىلەرى، تاماق جەتكىزۋشىلەر، جوعارى وقۋ ورىندارىنىڭ ستۋدەنتتەرى مەن كامەلەت جاسىنا تولماعاندار بار.

 

ماسەلەن، 22 ماۋسىم كۇنى قاراعاندى قالالىق پوليسيا باسقارماسىنا قاراستى وڭتۇستىك-شىعىس پوليسيا بولىمىنە 79 جاستاعى زەينەتكەردەن ارىز ءتۇستى. وعان بەلگىسىز بىرەۋ حابارلاسىپ، ءوزىن پوليسيا قىزمەتكەرىمىن دەپ تانىستىرعان. سوسىن قىزى قايعىلى جاعدايمەن اياقتالعان جول-كولىك وقيعاسىنا كىنالى بولعانىن ايتقان. ال قىلمىستىق جاۋاپكەرشىلىكتەن قۇتىلۋ ءۇشىن 15 مىڭ اقش دوللارىن بەرۋدى تالاپ ەتكەن. زەينەتكەر ونداي اقشاسىنىڭ جوق، الايدا قولىندا 9400 اقش دوللارىنىڭ بار ەكەنىن ايتقان. سول كەزدە "جالعان" پوليسەي دالاعا شىعىپ، اقشانى كۋرەرگە بەرۋدى بۇيىرعان. زەينەتكەر دالاعا شىعىپ، قولىنداعى 9400 اقش دوللارىن بەلگىسىز ءبىر كۋرەرگە بەرگەن. ارتىنان قىزىنا حابارلاسقاندا، ەشقانداي جول-كولىك وقيعاسى بولماعانىن بىلگەن.

 

پوليسەلەر اقشانى الىپ كەتكەن 20 جاستاعى جىگىتتى ۇستادى. ول ءوز كىناسىن مويىندادى. جاۋاپ بەرۋ كەزىندە جۇمىس ۇسىنعان اداممەن الەۋمەتتىك جەلى ارقىلى تانىسقانىن جەتكىزدى. مىندەتى – زەينەتكەردىڭ مەكەنجايىنا بارىپ، اقشانى الىپ كەتۋ. تاپسىرمانى ورىنداعانى ءۇشىن 400 اقش دوللارىن الىپ قالعان. ال قالعان اقشانى جەلى ارقىلى "جۇمىس بەرۋشىگە" جىبەرگەن. سونداي-اق كۇدىكتىنىڭ وسىعان ۇقساس تاعى دا ەكى قىلمىسقا قاتىسى بارى انىقتالدى. ءبىرىنشى جاعدايدا شىعىن كولەمى 8،4 ملن تەڭگە بولسا، ەكىنشى جاعدايدا 4 ميلليون تەڭگەنى قۇراعان. جابىرلەنۋشىلەردىڭ بارلىعى – زەينەتكەرلەر.