استاناداعى قىلمىستىق ىستەر جونىندەگى سوت القاسى رەسەيلىك گاز باعاسى تۋرالى مالىمەت كورسەتىلگەن قۇجاتتىڭ ءتۇپنۇسقاسى بولماعاندىقتان قازاقستاندىق كاسىپكەر قايرات بورانبايەۆتىڭ ۇكىمىنىڭ كۇشىن جويدى.
سوت ۇكىمى وسى جىلدىڭ 31 ناۋرىزىندا جاريالانعان. سول كەزدە سوت ءبىرىنشى پرەزيدەنتتىڭ بۇرىنعى قۇداسى قايرات بورانبايەۆ پەن ونىڭ بيزنەستەگى سەرىكتەسى رومان ناحانوۆتى، سونداي-اق "Qazaq Gaz" اق باسقارما ءتوراعاسىنىڭ بۇرىنعى ورىنباسارى تايىر جانۇزاقتى 8 جىلعا باس بوستاندىعىنان ايىردى.
"قازترانسگاز" اق-عا رەسەي تاراپىنان ۇسىنىلعان گاز باعاسى تۋرالى باستاپقى دەرەكتەردىڭ بولماۋى ۇكىمنىڭ كۇشىن جويۋعا سەبەپ بولدى.
"ۇكىم "گازپروم" جشق مەن "قازمۇنايگاز" اق اراسىندا 12.07.2019 جىلعى كەزدەسۋ حاتتاماسى بولعان دەگەن بولجامعا نەگىزدەلگەن. ول قۇجاتتىڭ 18-تارماعىندا مىڭ تەكشە مەتر گاز ءۇشىن ساتۋ باعاسى 145 اقش دوللارى دەپ بەلگىلەنگەن. باعاداعى ايىرما گاز باعاسىن جوعارىلاتۋ ارقىلى جىمقىرۋ رەتىندە قاراستىرىلدى. الايدا بۇل حاتتامانىڭ ءتۇپنۇسقاسى جوق. حاتتامادا قول قويعان تۇلعالاردىڭ ءاتى-جونى كورسەتىلمەگەن"، - دەپ جازىلعان استانا سوتىنىڭ قىلمىستىق ىستەر جونىندەگى سوت القاسىنىڭ قاۋلىسىندا.
"ايىپتاۋ تاراپىنىڭ بولجامى بويىنشا، حاتتاماعا قول قويدى دەگەن تۇلعالاردان ءىس بويىنشا جاۋاپ الىنبادى جانە بۇل قۇجاتتىڭ بار ەكەنى راستالمادى. "قازترانسگاز" اق قىزمەتكەرلەرىنىڭ حابارلامالارىنان الىنعان وسى حاتتامانىڭ ەلەكتروندى كوشىرمەسى ونىڭ شىنايىلىعىن دالەلدەۋ ءۇشىن جەتكىلىكسىز"، - دەپ تولىقتىردى سوتتاعىلار.
ىستە 17 تارماقتان تۇراتىن ءدال سول كۇنگى حاتتامانىڭ ءتۇپنۇسقاسى بار، گازدى 145 دوللاردان ساتۋ تۋرالى 18ء-شى تارماق وندا جوق. نەلىكتەن ءبىر كۇنى بىردەي ەكى حاتتامانىڭ بار ەكەنى بەلگىسىز: بىرەۋى شىنايى، ال ەكىنشىسى ورتا بۋىنداعى مەنەدجەرلەردىڭ ەلەكتروندىق حات الماسۋلارىنان جانە وعان ناقتى كىم قول قويعانى بەلگىسىز.
"وسىلايشا، سوت ۇكىمى قىلمىستىق ءىس جۇرگىزۋ زاڭناماسىن بۇزۋمەن شىعارىلدى، سوتتىڭ كىنا تۋرالى تۇجىرىمدارى بولجامعا نەگىزدەلگەن، قۇجاتتاردىڭ ءتۇپنۇسقالارى بولماعان جاعدايدا، ولاردىڭ سەنىمدىلىگى مەن دۇرىستىعىنا كۇمان تۋدىراتىن كوشىرمەلەرى نەگىزگە الىنعان، جول بەرىلمەيتىن دالەلدەمەلەر جانە تالدانباعان، شىنايىلىعى بويىنشا سالىستىرىلماعان جانە باسقا ءادىل دالەلدەمەلەرمەن راستالماعان دالەلدەمەلەر قولدانىلدى"، - دەپ قورىتىندىلادى سوت القاسى.
ولاردىڭ شەشىمىمەن قىلمىستىق ءىس ءبىرىنشى ساتىداعى سوتتىڭ قاۋلىسى بويىنشا اپەللياسيالىق تارتىپتە قارالادى. سوتتالعاندار قاماۋدا قالادى. سوتتالعاندار مەن ولاردى قورعاۋشىلاردىڭ اپەللياسيالىق وتىنىشتەرى ءىشىنارا قاناعاتتاندىرىلادى.
پىكىر قالدىرۋ