ماڭعىستاۋ وبلىسىنىڭ ستريتۆوركاۋت جانە ستريتليفتينگ بويىنشا فەدەراسياسىنىڭ پرەزيدەنتى، ەكى رەت گيننەستىڭ رەكوردتار كىتابىنا ەنگەن، ستريتليفتينگ پەن ستريتۆوركاۋتتان الەم چەمپيوناتتارىنىڭ جەتى مەدالىنىڭ يەگەرى يلدار ياگيايەۆ تابىس تابۋ ءۇشىن انگلياعا كوشكەن، دەپ جازادى Lada.kz. 

28 جاستاعى اقتاۋ تۇرعىنى ءقازىر انگلياداعى ەگىستىكتەن قىرىققابات پەن بروككولي تەرىپ جۇمىس ىستەپ ءجۇر.  سپورتشىنىڭ ايتۋىنشا، ەگىستىكتەگىلەردىڭ جۇمىسى كۇنىنە 8-9 ساعاتقا سوزىلادى. ال تاڭعى 4:00-ت دە تراكتور رولىنە وتىراتىن يلداردىڭ جۇمىسى تۇسكە تامان اياقتالادى. ول تەڭىز جاعاسىنداعى ءتورت قاباتتى ۇيدە باسقا جۇمىسشىلارمەن بىرگە تۇراتىنىن ايتتى. 

"مەن ءوتىنىش بەرگەن كەزدە ماعان جۇمىس ىستەيتىن ورىنداردىڭ ءتىزىمى بەرىلدى. قىرىققابات وسەتىن القاپتى ادەيى تاڭدادىم، ونى جيناۋ قۇلپىنايعا قاراعاندا قيىنىراق. سپورتشى رەتىندە ءوزىمدى سىناپ كورگىم كەلدى. بۇل نەگىزى ەر ازاماتتارعا ارنالعان جۇمىس. كوماندامىزدا ءبىر عانا تارازدىق ايەل بار"، دەيدى ول. 

اتالعان جۇمىس ورنىندا جالاقىنى اپتا سايىن بەرەدى. ال جالاقى كولەمى جۇمىس ىستەگەن ساعاتىنا بايلانىستى وزگەرىپ وتىرادى. 

"ايىنا شامامەن 2000 فۋنت، تەڭگەگە الماستىرعاندا ميلليون تەڭگە شىعادى. مۇنداي جالاقىنى قازاقستاندا تابۋىم ەكىتالاي. مۇمكىن بىرنەشە جەردە جۇمىس ىستەپ، كۇنىنە 2-3 ساعات ۇيىقتاپ ميلليون تەڭگەنى ارەڭ تاباتىن ەدىم"، دەيدى يلدار.

يلدار انگلياعا كوشكەنى تۋرالى كوپ تانىستارىنىڭ بىلەتىنىن ايتتى. جاقىندارىنىڭ ءبىر بولىگى ونىڭ بۇل شەشىمىن قولداسا، ءبىرى قارسىلىق بىلدىرگەن. سەبەبى كوبى جوعارى ءبىلىمى بار ازاماتتىڭ ەگىستىككە جۇمىس ىستەۋىن ۇيات سانايدى. ال يلدار ياگيايەۆتىڭ ەكى جوعارى ءبىلىمى بار. 

"كوپشىلىكتىڭ پىكىرىن ەلەمەستەن شەشىم قابىلدادىم. ءوزىمنىڭ وتباسىم ءۇشىن، بولاشاعىم ءۇشىن شەتەل استىم. اقتاۋدا سپورتتى دامىتۋ ءۇشىن بىرنەشە رەت ارەكەت جاسادىم. الايدا بارلىعى ناتيجەسىز بولدى. مەنى سپورت باسقارماسى تىڭدامادى. ءتۇرلى جارىستاردا جەڭىسكە جەتىپ، كوك تۋدى جەلبىرەتتىم. الايدا مەنى اەروپورتتان كۇتىپ العىسى كەلمەدى. شەنەۋنىكتەر ۇنەمى سپورتشىلارعا قولداۋ كورسەتۋ كەرەگىن ايتىپ جاتادى. ءبىزدىڭ ەلدە تەك بوكسشىلار، فۋتبولشىلار جانە كۇرەسپەن اينالىساتىندارعا عانا كوڭىل بولىنەدى. ال قالعاندارىنا تۇكىرگەنى بار"، دەپ ايتتى سپورتشى. 

يلدار تراكتورشى بولىپ ىستەيتىن قازاقستاندىقتار كوپ ەكەنىن دە جەتكىزدى.

"جۇمىس ىستەۋگە رۇقسات التى ايعا عانا بەرىلەدى. كوپتەگەن قازاقتار نەسيەسىن تولىق وتەپ ۇلگەردى. بىرەۋلەر كولىككە، ەندى بىرەۋلەر پاتەر الۋ ءۇشىن اقشا جينايدى. ايتپاقشى، مۇندا نەبارى ءبىر ايدا كولىك ساتىپ الۋعا بولادى. انگليادا جۇمىس ىستەگىسى كەلەتىندەردىڭ كوپتىگى سونشا، جۇمىسقا وتىنىمدەردى قابىلداۋ ءقازىردىڭ وزىندە توقتاتىلدى. ەگەر ۆيزالىق رەجيم بولماسا، مەن مۇندا نە بولار ەدى دەپ ەلەستەتە المايمىن. مەن بالالارىمنىڭ وسىندا تۇرعانىن قالايمىن. ويتكەنى، ولاردىڭ بولاشاعىن قازاقستاندا كورمەيمىن"، - دەيدى يلدار.