قاڭتار وقيعاسى كەزىندەگى "اۋەجايدى باسىپ الۋ ءىسى" بويىنشا بۇگىن ناۋرىزباي اۋداندىق سوتىندا ۇكىم شىقتى.
سوت ايىپتالۋشىلاردى كىنالى دەپ تانىپ، ايگەرىم تىلەۋجاندى 4 جىلعا باس بوستاندىعىنان ايىردى. ايگەرىم تىلەۋجان قاۋىپسىزدىگى ورتاشا تۇزەۋ كولونياسىندا جازاسىن وتەيدى. قالاس نۇرپەيىسوۆ پەن نۇرلان دالىبايەۆ 8 جىلعا سوتتالدى. سوت ۇكىمىمەن ەرمۇحامەت شىلىبايەۆقا پەن جانايدار كارمەنوۆ تە 8 جىلعا باس بوستاندىعىنان ايىرىلدى.
ازاتتىق باسىلىمىنىڭ دەرەگىنشە، سوت ۇكىمى شىعار كۇنى ناۋرىزباي اۋداندىق سوتى الدىنا سوتتالۋشىلاردىڭ جاقتاستارى، تۋىستارى مەن قوعام بەلسەندىلەرى بار، بارلىعى جۇزدەن استام ادام جينالعانى بايقالدى. سوت زالىنا كىرگەندەر ايىپتالۋشىلارعا بوستاندىق سۇراپ ۇرانداتتى.
"قاڭتار وقيعاسىنان كەيىن حالىقتى قورقىتا المايدى. ەشقانداي زاڭ بۇزباعانىما سەنىمدىمىن. ءوز ۇستانىمدارىمنان باس تارتپايمىن. كەرەك بولسا قامالۋعا دا دايىنمىن" - دەدى ايىپتالۋشى ايگەرىم تىلەۋجان.
ەسكە سالا كەتەيىك، وسىعان دەيىنگى سوت وتىرىستارىندا ايىپتالۋشىلاردىڭ جاقتاستارى "حالىق تەرروريست ەمەس" دەگەن جازۋمەن پلاكات اكەلىپ، ءوز ۇستانىمدارىن بىلدىرگەن بولاتىن.
پىكىر قالدىرۋ