الماتىدا 29 جاستاعى ايەل ەكى بالاسىنىڭ كوزىنشە وزىنە قول جۇمسادى. كەلىنشەك ءوز ۇيىندە باسقا تاعاتىن ورامالىنا اسىلىپ قالعان.

كۋاگەرلەردىڭ ايتۋىنشا، اناسىنىڭ سۋيسيد جاساعانىن 1 جانە 5 جاسار كىشكەنتەي قىزدارى كورىپ، ەشتەڭە تۇسىنبەي، جىلاي بەرگەن. مارقۇم كەلىنشەك قىرعىزستان ازاماتى ەكەن. كورشىلەرى كۇيەۋىنىڭ وزبىرلىعىنا شىداي الماي ومىرىمەن قوش ايتىسقان دەپ توپشىلايدى. 

قايعىلى وقيعا كەشكى ساعات وندار شاماسىندا بولعان. كۋاگەرلەردىڭ ايتۋىنشا، الدىمەن 5 جاسار قىز تەرەزەدەن جانۇشىرا ايعايلاپ كومەك سۇراپتى. بالانىڭ جىلاعان داۋىسىن العاش بولىپ اۋلادا دەمالىپ وتىرعان نۇرگۇل الىكبايەۆا ەستىگەن. كەلىنشەك الىپ-ۇشىپ پاتەرگە قاراي جۇگىرىپتى. الايدا ءۇيدىڭ ىشىنە كىرگەندە ءبارى تىم كەش بولعان. ول ءوز ورامالىنا اسىلىپ تۇرعان كورشىسىنىڭ جان تاپسىرعانىن كورىپ، بىردەن پوليسياعا حابارلاعان.

"ءبىر كىشكەنتاي بالاسى جەردە جاتىر ەكەن جىلاپ. ۇلكەن قىز جۇگىرىپ الدىمنان شىقتى دا "مامانى ءتۇسىرىڭىزشى، مامانى ءتۇسىرىڭىزشى" دەدى. مەن تۇسىرمەدىم. پوليسيا مەن جەدەل جاردەمگە حابارلاستىم. كۇندىز تاعىپ جۇرگەن ورامالى بولعان. سونىمەن بوساعاسىندا اسىلىپ تۇر ەكەن. اياق-باسى ءبارى كوگەرىپ كەتكەن. ءتىلى شىعىپ كەتكەن. كەش ەكەنىن ءتۇسىندىم. كەتكەنى بىردەن ءبىلىنىپ تۇردى"، - دەيدى وقيعا كۋاگەرى نۇرگۇل الىكبايەۆا.

كورشىلەرىنىڭ ايتۋىنشا، ءدىندار كۇيەۋى جۇبايىنا كۇن كورسەتپەي، ءجيى ۇرىپ-سوعادى. جانتۇرشىگەرلىك وقيعا بولعان مامىر-4 ىقشاماۋدانىنىڭ تۇرعىندارى مارقۇم زورلىق-زومبىلىققا شىداي الماي، وزىنە قول جۇمساۋى مۇمكىن دەپ توپشىلايدى.

"مارقۇممەن جاقىن ارالاسقان تۇرعىندار بولدى. كەشە ولار وسى وتباسىنداعى بارلىق جاعدايدى بايانداپ بەردى. ولاردىڭ ايتۋىنشا، ءۇش بالانىڭ اناسى كۇيەۋىنەن ءجيى تاياق جەيتىن. ايەل تىگىنشى بولىپ جۇمىس ىستەگەن. تاپقان تابىسىن دا كۇيەۋى قولىنا ۇستاتپايدى ەكەن. مارقۇم حيدجاب كيىپ جۇرەتىن، كۇيەۋىنىڭ قوعاداي ساقالى بار ەكەنىن كورگەنبىز"، - دەيدى كورشىسى جىبەك امەنوۆا.

ەسكە سالايىق، بۇعان دەيىن الماتىدا ايەل وزىنە قول جۇمساعانىن جازعان ەدىك.