شۋ اۋدانىندا قاراۋسىز قالعان عيماراتتىڭ جەرتولەسىنەن ءىرى كولەمدە وق-دارىلەر مەن قارۋ-جاراق تابىلدى، دەپ حابارلايدى Polisia.kz.
جەدەل-ىزدەستىرۋ ءىس-شارالارىن جامبىل وبلىسى پوليسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى جۇرگىزدى.
"9 دانا قارۋ مەن وق-دارىلەر، اتاپ ايتقاندا 4 دانا 16 كاليبرلى يج-زك ءبىر وقپاندى اڭشى مىلتىعى، 16 كاليبرلى يج-17 ءبىر وقپاندى شولاق مىلتىق، 9 مم كاليبرلى بايكال 79-9تم تراۆماتيكالىق تاپانشادان 2-ەۋ، تاپانشا، 5،45 مم كاليبرلى پاترونداردىڭ 270 داناسى، سونداي-اق قاڭتار وقيعاسى كەزىندە پوليسيا دەپارتامەنتىنىڭ قويماسىنان ۇرلانعان 9 مم كاليبرلى پم تاپانشاسى تابىلىپ، تاركىلەندى"، - دەلىنگەن پوليسيا حابارلاماسىندا.
پوليسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ باستىعى ءالىم باجىقبايەۆ قارۋعا سوت-بالليستيكالىق ساراپتاماسى تاعايىندالعانىن اتاپ ءوتتى.
قازىرگى ۋاقىتتا وسى دەرەككە قاتىستى قىلمىستىق كودەكستىڭ 287-بابىنىڭ 3-بولىگى (قارۋدى، وق-دارىلەردى، جارىلعىش زاتتاردى جانە جارىلعىش قۇرىلعىلاردى زاڭسىز ساتىپ الۋ، بەرۋ، وتكىزۋ، ساقتاۋ، تاسىمالداۋ نەمەسە الىپ ءجۇرۋ) بويىنشا سوتقا دەيىنگى تەرگەۋ امالدارى باستالدى.
پىكىر قالدىرۋ