قاراعاندى وبلىسىندا ءورت بولعان "قازاقستان" شاحتاسىنىڭ قىزمەتكەرلەرى باسقا كاسىپورىندارعا اۋىستىرىلدى. بۇل تۋرالى وبلىستىق اكىمدىكتىڭ اپپارات كەڭەسىندە "ارسەلورميتتال تەمىرتاۋ" اق اتقارۋشى ديرەكتورىنىڭ ورىنباسارى سەرگەي وگاي مالىمدەدى.
اپپارات كەڭەسى ءبىر مينۋت ۇنسىزدىكتەن باستالدى. مەملەكەتتىك قىزمەتشىلەر "ارسەلورميتتال تەمىرتاۋ" اق كومىر دەپارتامەنتىنىڭ "قازاقستان" شاحتاسىندا ءورت كەزىندە قازا تاپقان كەنشىلەردى ەسكە الدى.
"ارسەلورميتتال تەمىرتاۋ" اق تاۋ-كەن سەگمەنتى اتقارۋشى ديرەكتورىنىڭ ورىنباسارى سەرگەي وگايدىڭ ايتۋىنشا، شاحتادا ءورتتى وقشاۋلاۋعا كىرىسكەن.
"بۇگىنگى تاڭدا شاحتانىڭ 672 قىزمەتكەرى كومىر دەپارتامەنتىنىڭ باسقا كاسىپورىندارىنا اۋىستىرىلدى. قىزمەتكەرلەردەن شاحتانىڭ تىرشىلىگىن قامتاماسىز ەتۋ جانە اسكەريلەندىرىلگەن قۇتقارۋشىلاردىڭ جۇمىسىنا كومەك كورسەتەتىن ادامدار عانا قالدى"، – دەدى وگاي.
قاراعاندى وبلىسىنىڭ اكىمى ەرماعانبەت بولەكپايەۆ ءورت باستالعان ۋاقىتتا 222 شاحتەردى جەدەل ەۆاكۋاسيالاعان قۇتقارۋشىلاردىڭ ەڭبەگىن اتاپ ءوتتى.
"وكىنىشكە قاراي، بەس كەنشى قازا تاپتى. كومپانيا قازا تاپقانداردىڭ وتباسىلارى الدىندا مىندەتتەمە الدى. بارلىق قاجەتتى تولەم جاسالادى. اپاتتى تەرگەۋ جونىندەگى كوميسسيا قۇرىلدى، ونىڭ قۇرامىنا بارلىق جاۋاپتى مەملەكەتتىك ورگان كىردى، – دەدى وبلىس باسشىسى.
اكىمدىكتىڭ اقپاراتىنشا، ءقازىر اۋرۋحانادا زارداپ شەككەن 13 كەنشى جاتىر، بارلىعى قاجەتتى ەم الۋدا. دارىگەرلەردىڭ ايتۋىنشا، 8 كەنشىنىڭ جاعدايى ورتاشا اۋىر، قالعاندارى قاناعاتتانارلىق جاعدايعا جاقىن.
پىكىر قالدىرۋ