اقتاۋ قالاسىنىڭ اكىمدىگى قالاداعى پرەزيدەنتىڭ بۇرىنعى رەششيدەنسياسىنىڭ ورنىنا نە سالىناتىنىن ايتتى، دەپ جازادى Lada.kz باسىلىمى.  

پرەزيدەنتتىڭ بۇرىنعى رەزيدەنسياسى بالالار ءۇشىن قايتا جابدىقتالادى، الايدا قالالىق اكىمدىك سامال شاعىناۋدانىنداعى 225 گەكتاردان اسا جەر ۋچاسكەسىندە ناقتى نە سالىناتىنى تۋرالى شەشىم ءالى قابىلداماعان.

بۇعان دەيىن قۇنى شامامەن 1 ميلليارد تەڭگە بولاتىن جەر ۋچاسكەسىنىڭ مەملەكەتكە قايتارىلعانى ايتىلعان ەدى. ماڭعىستاۋ وبلىسى اكىمدىگىنىڭ جەر قاتىناستارى باسقارماسى 2002-2004 جىلدارى جەر ۋچاسكەسى «ماڭعىستاۋمۇنايگاز» اق مەنشىگىنە بەرىلىپ، كوپ ۋاقىت وتپەي، Oil Real Estate جشس-نە ساتىلعانىن حابارلاعان بولاتىن.

سوت تەرگەۋ ارقىلى 20 جىلدان اسا ۋاقىتتان كەيىن جەر ۋچاسكەسىنىڭ زاڭسىز ساتىلعانىن انىقتادى. ۋچاسكە يەسى اپەللياسيالىق شاعىم بەرۋ ارقىلى ءبىرىنشى ساتىداعى سوتتىڭ شەشىمىن جويۋعا تىرىستى.

جەر ۋچاسكەسىن بەرۋ كەزىندە اقتاۋ قالاسىنىڭ اكىمدىگى جالپى ءتارتىپتى ساقتاماعان، ياعني جەر ۋچاسكەسى جەر كوميسسياسىنىڭ جانە جەرگە ورنالاستىرۋ جوباسىنىڭ قورىتىندىسىنسىز بەرىلگەن. دەپارتامەنتتىڭ جەر ۋچاسكەسىن مەملەكەت مەنشىگىنە قايتارۋ تۋرالى تالابىن ءبىرىنشى ساتىداعى سوت قاناعاتتاندىردى. جاۋاپكەر بەرگەن اپەللياسيالىق شاعىم ماڭعىستاۋ وبلىستىق سوتىنىڭ شەشىمى بويىنشا قاناعاتتاندىرىلمادى. سوت شەشىمى زاڭدى كۇشىنە ەندى، - دەپ حابارلادى ماڭعىستاۋ وبلىسى اكىمدىگىنىڭ جەر قاتىناستارى باسقارماسى Lada.kz باسىلىمىنا.

اقتاۋ قالالىق اكىمدىگى بۇل جەر ۋچاسكەسىندە ناقتى نە سالىناتىنى ءالى بەلگىسىز ەكەنىن حابارلادى.

بۇل ۋچاسكە باس جوسپارعا ەنگىزىلىپ، ەگجەي-تەگجەيلى جوسپارلاۋ ازىرلەنەدى. وسىدان كەيىن عانا ۋچاسكەدە نە سالىناتىنىن ايتۋعا بولادى، - دەپ جاۋاپ بەردى اكىمدىك.

ەسكە سالا كەتسەك، بۇعان دەيىن ەل پرەزيدەنتىنىڭ تاپسىرماسى بويىنشا قوستاناي، اقتاۋ، تاراز، اتىراۋ جانە اقتوبەدەگى وڭىرلىك رەزيدەنسيالار اكىمدىكتەرگە بالالاردىڭ قاجەتتىلىكتەرىنە بەرىلەتىنى حابارلانعان بولاتىن. سونداي-اق اتىراۋ، جامبىل، اقتوبە وبلىستارىنداعى پرەزيدەنت رەزيدەنسيالارىن بالالار ساۋىقتىرۋ ورتالىقتارىنا اينالدىرۋ جوسپارلانعان.