توتەنشە جاعدايلار مينيسترلىگى بولىمشەلەرىنىڭ ءاربىر ەكىنشى باسشىسى سىبايلاس جەمقورلىققا جول بەرگەن. بۇل تۋرالى بۇگىن توتەنشە جاعدايلار مينيسترلىگىنىڭ باسشىلىعىمەن وتكەن كەڭەس بارىسىندا سىبايلاس جەمقورلىققا قارسى قىزمەتتىڭ ءتوراعاسى اسحات جۇماعالي ءمالىم ەتتى. 

ونىڭ ايتۋىنشا، سوڭعى 5 جىلدا ازاماتتىق قورعاۋ ورگاندارىندا 150-گە جۋىق سىبايلاس جەمقورلىق فاكتىسى تىركەلگەن. جەمقورلىق ەلىمىزدىڭ بارلىق وڭىرىندە جاسالعان. ولاردىڭ باسىم بولىگى الماتى، استانا، شىمكەنت قالالارىندا، قوستاناي جانە الماتى وبلىستارىندا انىقتالعان. اسىرەسە پاراقورلىق پەن جىمقىرۋ فاكتىلەرى كوش باستاپ تۇر.

ءورت قاۋىپسىزدىگىن قامتاماسىز ەتۋ بويىنشا تەكسەرۋ اكتىسىنە قول قويۋ كەزىندە، وقۋدان وتكىزۋ، رۇقسات بەرۋ جانە جۇمىسقا ورنالاسۋ ءۇشىن پارا بەرىلىپ وتىرعان. اگەنتتىك ءتوراعاسى سىبايلاس جەمقورلىققا قارسى جۇرگىزىلىپ جاتقان جۇمىستارعا قاراماستان، تجم قىزمەتكەرلەرى پارا الۋدان تىيىلماعانىن اتاپ ءوتتى.

"كۇنى كەشە جەتىسۋ وبلىسىندا جەرگىلىكتى تجد ءبولىم باسشىسىنىڭ جۇمىسقا العان ادامنان اقشا العانى انىقتالدى. ول بۇگىنگى ءىس-شارانىڭ وتەتىنىن بىلە تۇرا، سوندا دا قىلمىسقا بارىپ وتىر. بۇل ورايدا پروفيلاكتيكالىق تۇرعىدا ناقتى ارەكەت ەتۋ قاجەت. قىزمەتكەرلەردىڭ مىنەز-قۇلقىن تۇزەتىپ، پسيحولوگيالىق كوزقاراسىن وزگەرتۋ ماڭىزدى" – دەدى اسحات جۇماعالي.

توتەنشە جاعدايلار ءمينيسترى جوعارىدا اتالعان فاكتىلەردى مويىنداپ،ۆەدومستۆو سىبايلاس جەمقورلىققا قارسى كۇرەستى كۇشەيتۋ ءۇشىن تۇبەگەيلى قادامدار جاسايتىنىن مالىمدەدى.

"بۇل – ءبىزدىڭ قىزمەتكەرلەر ءۇشىن جاعا ۇستاتارلىق جاعداي. اتالعان ادامدار بەلگىلى ءبىر جەتىستىكتەرگە قول جەتكىزگەن ۇزدىك قىزمەتكەرلەردىڭ قاتارىنان بولاتىن. دەگەنمەن وسى جاعدايدا ولاردىڭ ءبىز بىلمەگەن تەرىس قاسيەتى – ەكىجۇزدىلىگى اشكەرەلەندى. ايتىلىپ وتكەن دەرەكتەرگە قاتاڭ سىنمەن قارايمىز. بۇدان  ءتيىستى ساباق الامىز، قاراپايىم ءورت سوندىرۋشىلەر بىزگە سەنىممەن قاراۋى كەرەك"، – دەدى ءشارىپحانوۆ.

.