تۇركيادا جول اپاتىنا تۇسكەن تاعى ءبىر قازاقستاندىق كوز جۇمدى، دەپ حابارلايدى كتك ارناسىنا سىلتەمە جاساپ. نۇربولات قۇرماشوۆ جانساقتاۋ بولىمىنە تۇسكەن ەدى. كەشە ول ەسىنەن جيماستان قايتىس بولدى.
الانياداعى جول اپاتىندا قازاقستاننان دەمالۋعا بارعان ءبىر وتباسىنىڭ ەكى مۇشەسى وقيعا ورنىندا قايتىس بولعان. اتىراۋلىق جۋرناليست ارايلىم باقىتجان مەن ونىڭ ەكى جاستاعى قىزى دارىگەرلەر كەلگەنشە كوز جۇمدى. ال ونىڭ كۇيەۋى نۇربولات قۇرماشوۆ جانساقتاۋ بولىمىنە تۇسكەن. كەشە ول ەسىنەن جيماستان قايتىس بولدى. ولاردىڭ 9 جاسار ۇلى امان قالدى.
بۇگىن مارقۇمداردىڭ سۇيەگى ەلگە جەتكىزىلەدى.
ايتا كەتەرى، بۇعان دەيىن سىرتقى ىستەر مينيسترلىگى جول اپاتىنىڭ ءمان-جايىن جاريالاعان. سول كۇنى سافاري-دجيپتە 15 ادام بولعان. وعان ەكى بالاسىمەن بىرگە قازاقستاندىق ەرلى-زايىپتى دا مىنگەن. ولار 30 تامىز كۇنى الانياعا دەمالۋعا بارعان. 4 قىركۇيەكتە ەلگە قايتۋدى جوسپارلاعان. سافاري-دجيپ قاتار كەلە جاتقان كولىكپەن سوقتىعىسقان. ءبارى كولىكتەن ۇشىپ تۇسكەن. ال پوليسيا ادامداردىڭ قاۋىپسىزدىك بەلدىگىن تاقپاعانىن ايتىپ وتىر. ءبىراق مينيسترلىك وكىلدەرى 15 ادامنىڭ شاعىن سافاري دجيپكە قالاي سىيعانىن تۇسىنبەي وتىر.
بۇعان دەيىن الانيادا دەمالىپ قايتقان Sputnik قازاقستاننىڭ وقىرمانى سافاري-دجيپتە ەشقانداي قاۋىپسىزدىك بەلدىگىن كورمەگەنىن ايتتى.
"ءوز باسىم قاۋىپسىزدىك بەلدىگىن كورگەن ەمەسپىن. 10-15 ادامدى ءدجيپتىڭ ارتىنا وتىرعىزىپ قويادى دا، بىر-بىرىمەن جارىسادى. توبەسى اشىق، ەشكىم وتىرمايدى، تۇرەگەپ تۇرادى. جولدا بىر-بىرىنە سۋ شاشادى. كولىك جۇرگىزۋشىسى قاۋىپسىزدىكتى ساقتاۋ قاجەتتىگىن ايتپايدى دا، ولار ويىن-ساۋىقتىڭ كوپ بولعانىن قالايدى عوي. ينتەرنەتتە ۆيدەولارى كوپ"، - دەيدى استانا تۇرعىنى.
