تانىمال جۋرناليست جانات باقىتقا الەۋمەتتىك جەلىدەگى ءدىني جازبالارى ءۇشىن 172 500 تەڭگە ايىپپۇل سالىندى. بۇل تۋرالى اتىراۋ وبلىسى ءدىن ىستەر باسقارماسى حابارلادى. ۆەدومستۆاعا اتىراۋ وبلىسى تۇرعىندارىنىڭ اتىنان بىرنەشە ارىز كەلىپ تۇسكەن.
"ارىزدا الەۋمەتتىك جەلىدە تانىمال جۋرناليست جەلىدەگى پاراقشالارى ارقىلى يسلام دىنىنە ءتىل تيگىزىپ، بارشا مۇسىلمانداردىڭ، سونىڭ ىشىندە جەكە ءدىني سەزىمىنە قورلىق جاسالعانىن كورسەتكەن. وسى رەتتە باسقارما تاراپىنان Instagram الەۋمەتتىك جەلىسىندەگى Zhanat Baqyt جانە zhan_zhihany پاراشالارى ءدىن ىستەرى كوميتەتىنە ءدىنتانۋ ساراپتاماسىن جاساۋعا جولداعان بولاتىن. ساراپتاما قورتىندىسى نەگىزىندە، بۇل پاراقشالاردا شىنىمەن يسلام سەنىمىن ۇستاناتىن ازاماتتاردىڭ ءدىني سەنىمىن قورلاۋعا جانە ءوز كەزەگىندە قوعامدا ءتۇرلى ءدىني تالاس-تارتىستارعا سەبەپ بولاتىن اقپاراتتار جاريالانعانى انىقتالدى. قازىرگى تاڭدا الماتى وبلىسى تالعار اۋدانىنىڭ سوتىنىڭ شەشىمىمەن پاراقشالاردىڭ يەسى كىنالى دەپ تانىلىپ ايىپپۇل سالىنعانىن حابارلايمىز. الداعى ۋاقىتتا بۇل پاراقشالاردى بۇعاتتاۋ ءۇشىن اقپاراتتى مادەنيەت جانە اقپارات مينيسترلىگىنە جىبەرەمىز"، - دەيدى اتىراۋ وبلىسىنىڭ ءدىن ىستەرى باسقارماسىنىڭ باس مامانى ەرلان ەرعالييەۆ
اتىراۋ وبلىسى ءدىن ىستەرى باسقارماسى ق ر ءدىني قىزمەت جانە ءدىني بىرلەستىكتەر تۋرالى زاڭىنىڭ 3 بابى 5 تارماعىنا سايكەس جەكە تۇلعالاردىڭ دىنگە كوزقاراسى سەبەپتەرى بويىنشا ازاماتتىق قۇقىقتارىنىڭ بۇزىلۋىنا نەمەسە ولاردىڭ ءدىني سەزىمدەرىن قورلاۋعا، قانداي دا ءبىر ءدىندى ۇستانۋشىلار قاستەرلەيتىن زاتتاردى، قۇرىلىستار مەن ورىنداردى بۇلدىرۋگە جول بەرىلمەيتىنىن ەسكەرتتى.
پىكىر قالدىرۋ