ءقازىر ەلىمىزدە 8،4  ميلليوننان استام ادامنىڭ قارىزى بار. بۇل تۋرالى ەرلان جاقان ۇلى ماجىلىستە وتكەن پارلامەنتتىك تىڭداۋدا مالىمدەدى.

ونىڭ ايتۋىنشا ءقازىر حالىقتىڭ قارجىلىق ساۋاتىنىڭ تومەندىگى مەن نەسيەگە تاۋەلدىلىگى ۇلكەن پروبلەماعا اينالىپ وتىر. 

"جاسىراتىنى جوق، ءقازىر بانكتەردەن شەكتەۋسىز كرەديت الىپ، قارىزعا بەلشەسىنەن باتىپ وتىرعان ازاماتتارىمىز كوپ. "حالىق نەسيە قامىتىن كيىپ وتىر" دەسە دە بولادى قازىرگى ۋاقىتتا حالىقتىڭ 84 پايىزىندا، ياعني 8،4  ميلليوننان استام ادامنىڭ قارىزى بار ەكەن. سوڭعى ءبىر جارىم جىل ىشىندە بۇل كورسەتكىش 27 پايىزعا وسكەن. 90 كۇننەن كەشىكتىرىلگەن قارىز كولەمى –شامامەن 1،4 ترلن. تەڭگە. ياعني، 1،7 ميلليون ادام قارىزىن ۋاقىتىلى تولەي الماي وتىر دەگەن ءسوز. وسىنىڭ ءبارى نەسيە پروبلەماسىنىڭ قانشالىقتى اسقىنىپ كەتكەنىن كورسەتەدى"، دەيدى ەرلان جاقان ۇلى. 

سونداي-اق ەرلان قوشانوۆ جاسوسپىرىمدەردىڭ ونلاين كرەديت الاتىنى تۋرالى دا ايتىپ ءوتتى. 

"14-16 جاستاعى جاسوسپىرىمدەردىڭ كرەديت الۋى ءۇشىن سمارتفون مەن ينتەرنەت جەتكىلىكتى. مۇنداي جاسوسپىرىمدەر قارجىلىق جاۋاپكەرشىلىكتى سەزىنە الا ما؟ ولاردىڭ تولەي الماعان نەسيەسىن اكە-شەشەسى، اتا-اجەسى تولەيدى"، دەدى ول. 

بۇگىن ماجىلىستە حالىقتىڭ شامادان تىس كرەديت الۋىن ازايتۋ جانە قارجىلىق ساۋاتتىلىقتى ارتتىرۋ تۋرالى پارلامەنتتىك تىڭداۋ ءوتىپ جاتىر.