كەمەل شاعىن اۋدانىنداعى جاڭا وتباسىلىق-دارىگەرلىك امبۋلاتوريانىڭ قىزمەتىن 8 مىڭ تۇرعىن پايدالانا الادى. 

الماتى اكىمى ەربولات دوسايەۆ جەتىسۋ اۋدانىن ارالاۋ بارىسىندا كەمەل شاعىن اۋدانىنداعى 200 ادام قابىلدايتىن وتباسىلىق-دارىگەرلىك امبۋلاتورياعا باردى. قالا باسشىسى پاسيەنتتەردى قابىلداۋعا ارنالعان كابينەتتەردى، پروسەدۋرالىق جانە ۋدز كابينەتتەرىن كوردى. 

مەگاپوليس باسشىسىنا قازىرگى ۋاقىتتا نىسانداعى بارلىق قۇرىلىس-مونتاج جۇمىسى اياقتالعاندىعى تۋرالى باياندالدى. ينجەنەرلىك كوممۋنيكاسيالارعا قوسىلۋ بويىنشا جۇمىستار جۇرگىزىلگەننەن كەيىن امبۋلاتوريا جۇمىسىن باستايدى.

جاڭا وتباسىلىق-دارىگەرلىك امبۋلاتوريا كەمەل شاعىن اۋدانىنىڭ 8 مىڭنان استام تۇرعىنىن قولجەتىمدى مەديسينالىق قىزمەتپەن قامتاماسىز ەتەدى. ءقازىر ولار كەمەل شاعىن اۋدانىنان 3،5 شاقىرىم جەردە ورنالاسقان كوكجيەك شاعىن اۋدانىندا قارالىپ ءجۇر. ال №21 قالالىق ەمحاناعا 42 600 تۇرعىن تىركەلگەن. جاڭا امبۋلاتوريانىڭ ارقاسىندا ەمدەۋ مەكەمەسىندە جۇكتەمەنىڭ ۇشتەن ءبىرى ازايادى.

№ 21 ەمحانانىڭ باس دارىگەرى ەرلان قۇدابايەۆ ەمدەۋ مەكەمەسىندە كومەك كورسەتۋدىڭ جەدەلدىگى دارەجەسىن ەسكەرە وتىرىپ، پاسيەنتتەردى ساناتتارعا ءبولۋدى كوزدەيتىن ترياج-جۇيە ەنگىزىلگەنىن، سيفرلىق كەزەك، شتات جوعارى مامانداندىرىلعان دارىگەرلەرمەن جاساقتالعانىن حابارلادى. بۇگىندە مەديسينا قىزمەتكەرلەرىنىڭ شتاتى قالىپتاسىپ، قۇرال-جابدىق ساتىپ الىندى.

ەربولات دوسايەۆ پاسيەنتتەردى قابىلداۋدى باستاۋ ءۇشىن جاڭا امبۋلاتوريانى جابدىقتاۋ جانە كوممۋنيكاسيالارعا قوسۋ جۇمىستارىن تەزدەتۋدى تاپسىردى.

انىقتاما: 2023 جىلى الماتىدا 2 وتباسىلىق-دارىگەرلىك امبۋلاتوريا اشىلدى. جەلتوقسانعا دەيىن تاعى 4 امبۋلاتوريانىڭ قۇرىلىسىن اياقتاۋ جوسپارلانعان.