"ەسكى قازاقستانى قايسى، جاڭاسى قايسى" دەپ ۇقپاي جۇرگەندەر بار ما ەدى؟
وتكەن سەنبىدە استاناداعى "رەسپۋبليكالىق باس مەشىتتە" (ونداي دا بار) كەشەگى ەلباسىمىز نۇرسۇلتان نازاربايەۆ مارقۇم ءىنىسى بولات نازاربايەۆتىڭ اسىن بەردى.
بولات نازاربايەۆتىڭ ولىمىنە ءالى سەنبەي جۇرگەندەردىڭ بار كۇمانى وسىمەن تىنسا كەرەك.
ءبىر قىزىعى، بولات مارقۇمنىڭ اسى "جابىق جاعدايدا" ءوتتى. قاراپايىم حالىقتان ەشكىمدى كىرگىزبەگەن. ەسەسىنە "ەسكى قازاقستان" قاز-قالپىندا جينالدى. ماسەلەن، اسقا كەلگەندەر اراسىندا تۇڭعىش پرەزيدەنت نۇرسۇلتان نازاربايەۆتىڭ ءوزىن ايتپاعاندا:
- ۇقك ەكس-باسشىسى نۇرتاي ابىقايەۆ
- كونستيتۋسيالىق كەڭەستىڭ بۇرىنعى ءتوراعاسى قايرات ءمامي
- تۇركىستان وبلىسىنىڭ بۇرىنعى اكىمى ءومىرزاق شوكەيەۆ
- ىشكى ىستەر ءمينيسترى بولعان قالمۇحانبەت قاسىموۆ پەن ەرلان تۇرعىمبايەۆ
- داريعا نازاربايەۆا مەن ونىڭ كۇيەۋى قايرات شارىپبايەۆ
- بۇرىنعى باس پروكۋرور قايرات قوجامجاروۆ
- پرەزيدەنت اكىمشىلىگىن باسقارعان ادىلبەك جاقسىبەكوۆ
- وليگارح كۇيەۋ بالا تيمۋر قۇلىبايەۆ
- الماتىنىڭ ەكس-اكىمى جانە "سامۇرىق قازىنا" قورىنىڭ ەكس-باسشىسى احمەتجان ەسىموۆ
- پرەزيدەنتتىڭ ەكس-كومەكشىسى ءھام كونستيتۋسيالىق كەڭەستىڭ بۇرىنعى حاتشىسى قايىربەك سۇلەيمەنوۆ
- بۇرىنعى ءماجىلىس دەپۋتاتى قۋانىش سۇلتانوۆ
- پرەزيدەنت اكىمشىلىگىندە ءىس باسقارعان اباي بيسەمبايەۆ
- شقو-نىڭ ەكس-اكىمى دانيال احمەتوۆ
- ەلدىڭ بۇرىنعى باس يدەولوگى بولعان مارات ءتاجين
- بۇرىنعى قورعانىس ءمينيسترى نۇرلان ەرمەكبايەۆ
- نازاربايەۆ زياتكەرلىك مەكتەپتەرىن باسقارعان كۇلاش شامشيدينوۆا
- تاريحشى بۇركىتباي اياعان، نۇرسۇلتان مەن بولات نازاربايەۆتاردىڭ تۋعان قارىنداسى ءانيپا نازاربايەۆا، كەشەگى "ساراي بۇلب ۇلى" ەرمۇحامەت ەرتىسبايەۆ سياقتى تۇلعالار بايقالدى.
بۇلاردىڭ ءبارى – كىلەڭ بۇرىنعى باسشىلار بولعانىمەن، قولىندا ءالى دە بايلىعى، كەرەك دەسەڭ كۇشى، ارتىنان ەرەر رۋلاس-جىمداستارى بار، بىلايشا ايتقاندا جەردە جاتقان ادامدار ەمەس ەكەنى انىق. قازاقستانداعى ءالى تالاي جەرگە ىقپالى جۇرەدى، مەشىتتەگى وسى اس تۋرالى اقپاراتتى تاراتۋعا وزدەرىنىڭ باق-تارىنا پارمەن بەردى.
نازاربايەۆ كوسىلە سويلەدى، ءوز ەڭبەگىن قازاق حالقى ەلەۋ كەرەكتىگىن جەتكىزدى. دانيال احمەتوۆ: "بولات نازاربايەۆ ادال ادام بولدى" دەدى.
ايتپاقشى، كەي باسىلىمداردا كىلەڭ "بۇرىنعىلار" جينالعان بولاتتىڭ اسىنا "قازىرگى" ەنەرگەتيكا ءمينيسترى الماسادام ساتقالييەۆ قاتىسىپتى دەگەن اقپارات شىقتى. سول-اق ەكەن، مينيسترلىكتىڭ وكىلى جىلان شاعىپ العانداي جالما-جان "بۇل مالىمەت جالعان، مينيستر اتالعان ءىس-شاراعا قاتىسقان جوق" دەپ جانتالاسا اقپارات تاراتتى. ەگەر دانيال احمەتوۆ ايتقانداي، بولات ادال ادام بولسا، ونىڭ اسىنا بارۋدا تۇرعان نە بار ەدى، سونشاما؟
دەگەنمەن، قازىرگى بيلىكتە وتىرعان شەنەۋنىكتەردىڭ نازاربايەۆتارعا قاتىستى ءىس-شارالاردان ات تونىن الا قاشۋى تەگىن ەمەس سياقتى. "جىلاندى ءۇش كەسسەڭ دە كەسىرتكەدەي كۇشى بار"، ەسكى قازاقستان ريەۆانش جاساپ، بيلىككە قايتا جارماسۋى مۇمكىن دەگەن كۇدىك بار ءالى قوعامدا.
