تاريحي «مگۋ» دەسە، ماسكەۋدىڭ ءتۇر-تۇر­پاتى كەرەمەت وقۋ عيماراتى جادىمىزدا جاڭعىرسا، «مگۋ-دىڭ نەمەسە ءممۋ-دىڭ قازاقستان فيليالى» دەسە، ل.ن.گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ جاڭا وقۋ-زەرتحانالىق عيماراتى ەسكە ءتۇ­سەدى. مۇنىڭ وزىندىك ءمانى دە بار.

1994 جىلى ەلباسىمىز ماسكەۋ مەم­لەكەتتىك ۋنيۆەرسيتەتى مىنبەرىنەن ەۋرا­زيالىق ەكونوميكالىق وداق يدەياسىن ءمالىم ەتتى. ارادا ەكى جىل شاماسىندا بولاشاق ەلوردا دەپ ۇكىلەنگەن جەردە ل.ن.گۋميليەۆ اتىنداعى ەۋرازيا ۋنيۆەرسيتەتىنىڭ نەگىزى قالاندى. اتالعان وقۋ ورنىنىڭ قاناتى قاتايا باستاعان شاقتا مەملەكەت باسشىسى ءبىلىم مەن تانىمنىڭ جاڭا سەرپىنىن نۇسقادى. ول ەۋرازيا ۋنيۆەرسيتەتى بازاسىندا م.ۆ. لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ قازاقستان فيليالىن اشۋ يدەياسى ەدى.

سول تاريحي ساتتەردى ممۋ رەكتورى ۆ.ا.سادوۆنيچيي بىلايشا ىقىلاسپەن ەسكە الادى: «مەن قازاقستان پرەزيدەنتى ن.ءا.نا­زاربايەۆتىڭ كەز كەلگەن ماسەلەنى الىس­تان بولجاپ شەشەتىنىنە قايران قالا­مىن. ول كىسىنىڭ بولاشاق تۋرالى ويى تەك جا­سامپازدىقتان تۇرادى. سول ءۇشىن دە ءبىزدىڭ عىلىمي ورتا نۇرسۇلتان ءابىشۇلىن ەرەكشە باعالايدى. ماسكەۋ مەملەكەتتىك ۋنيۆەرسيتەتىنىڭ ءبىر مەزگىلدە ءارى قۇرمەتتى دوكتورى، ءارى قۇرمەتتى پروفەسسورى بولعان جالعىز عانا پرەزيدەنت بار. ول – نۇرسۇلتان ءابىش ۇلى نازاربايەۆ. ەستە بولار فاكت: ن.ءا.نازاربايەۆ ماعان قازاقستان فيليالىن اشۋ تۋرالى يدەيانى الدەقايدا بۇرىن ايتتى. ءبىراق پوستكەڭەستىك جاعدايدا كوپ زاڭ وزگەرىپ، مۇمكىندىكتەر شەكتەلگەن ەدى. ءتىپتى، ممۋ جارعىسىندا فيليال اشۋ تۋرالى باپ تا جوق بولاتىن. اقىرى قازاقستان باسشىسى ءوز باستاماسى مەن يدەياسىن ورىنداماي قوي­مادى. ناتيجەسى – كوز الدارىڭىزدا. كەيىن باسقا مەملەكەتتەر سىزدەردەن ۇلگى الدى…».

استانادان م.ۆ.لومونوسوۆ اتىنداعى ءممۋ-دىڭ قازاقستان فيليالىن اشۋ تۋرالى شەشىم 2000 جىلى 30 تامىزدا سول ۋنيۆەرسيتەتتىڭ جوعارى ورگانى – عىلىمي كەڭەسىندە قابىلداندى.

وسى جىلى 9 قازاندا رەسەي فەدە­را­سياسىنىڭ پرەزيدەنتى ۆ.ۆ.ءپۋتيننىڭ ­قا­زاق­­ستانعا جاساعان العاشقى رەسمي ساپارى بارىسىندا ممۋ رەكتورى، اكادەميك ۆ.ا.سادوۆنيچيي مەن ءبىلىم جانە عىلىم ءمينيسترى ق.كوشەربايەۆ استانا قالاسىندا ل.ن.گۋميليەۆ اتىنداعى ەۋرازيا ۇلتتىق ۋنيۆەرسيتەتى بازاسىندا م.ۆ.لومونوسوۆ اتىنداعى ماسكەۋ مەملەكەتتىك ۋني­ۆەر­سي­تەتىنىڭ قازاقستان فيليالىن قۇرۋ تۋرالى حاتتاماعا قول قويدى.

بۇل قۇجاتقا مىنانداي ىرگەلى مۇراتتار ەندى: ءبىرىنشى، عىلىم-بىلىمدەگى ءوزارا ءتۇ­سىنىستىك پەن ىقپالداستىق؛ ەكىنشى، مامان ازىرلەۋدىڭ جاڭا تۇجىرىمدامالىق دەڭگەيى؛ ءۇشىنشى، ءداستۇر مەن اكادەميالىق ەركىندىكتى قاتار ۇستاۋ.

تاعى دا تاياۋ تاريحقا كوز سالايىق: 2000 جىلى تامىز بەن قازانداعى جوعا­رى­دا ايتىلعان ناقتى شارالاردان كەيىن، 1 جەلتوقساندا ماسكەۋ مەملەكەتتىك ۋنيۆەر­سيتەتىنىڭ رەكتورى، اكادەميك ۆ.ا.سا­دوۆ­نيچيي قازاقستان فيليالىن قۇرۋ تۋرالى رف زاڭدىلىعىنا ساي بۇيرىق شى­عاردى. وسىمەن ءبىر مەزگىلدە رەسەي فەدە­راسياسىنىڭ ءبىلىم مينيسترلىگى مەن قازاقستان رەسپۋبليكاسىنىڭ ءبىلىم جانە عىلىم مينيسترلىگى «استانا قالاسىندا ممۋ قازاقستان فيليالىن قۇرۋ تۋرالى» كەلىس­كەن شەشىمگە قول قويدى.

بۇل تاريحي شەشىم تۋرالى ل.ن.گۋميليەۆ اتىنداعى ەۋرازيا ۇلتتىق ۋني­ۆەر­سيتەتىنىڭ سول كەزدەگى رەكتورى، قوعام قايرات­كەرى م.جولداسبەكوۆ بىلاي دەيدى: «90-جىل­داردىڭ ەكونوميكالىق قيىندىعىنان ەندى قۇتىلعان كەز. قۇدايى كورشىلەرمەن دوستاسا وتىرىپ شەكارانى شەگەندەۋ، پىكىرلەسە وتىرىپ ايماق تىنىشتىعىن ساقتاۋ – نۇرسۇلتان ءابىش ۇلىنىڭ اسىل ماقساتىنا اينالدى. ءبىر كەزدە كوزدىڭ ۇشىنداعى، تالايدىڭ ارمان-قيالىنداعى ممۋ-دى ءبىر ەسىگىن استانادان اشىپ، جاس­تارىمىزدى ۇلكەن مەكتەپكە ەنگىزۋ – ول دا نۇرەكەڭنىڭ اقىلى ەدى. تاپسىرمانىڭ اتى – تاپسىرما، كۇندىز وتىرمادىق، تۇندە ۇيىقتامادىق، ءبىر كەزدە كومەكشىم، سول شاقتا ءمينيسترىم بولعان قىرىمبەك ەلەۋ ۇلى بار، استانا-ماسكەۋ اراسىن شارلاپ ءجۇرىپ، ەلەۋلى ولجاعا كەنەلدىك. ول – ءبىلىم، عىلىم، تاتۋ­لىق ولجاسى ەدى…».

وسى ۋاقىتتان ناقتى وقۋ ۇدەرىسىن باستاۋعا دايارلىق جۇمىستارى جۇرگىزىلدى. ممۋ قازاقستان فيليالى ل.ن.گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ نەگىزىندە اشىلعاندىقتان، اتالعان وقۋ ورنىنىڭ ءار كەزدەگى باسشىلارى مىرزاتاي جولداسبەكوۆ، سارسەنعالي ءابدىماناپوۆ، باقىتجان ءابدىرايىم، باسقا دا اتى مەن زاتى، مەكتەبى بار عالىمدار فيليالدىڭ قالىپتاسۋىنا ەلەۋلى ۇلەس قوستى. «كوڭىل سىيسا، ءبارى سىيادى» دەگەندەي، ۋنيۆەرسيتەت وقۋ ءدارىسحانالارىن، قاجەتتى ماتەريالدىق بازانى، ستۋدەنتتەر ءۇشىن جاتاقحاناداعى ورىندى سۇرانىسقا ساي تەڭ ءبولدى. ماسكەۋ مەملەكەتتىك ۋنيۆەرسيتەتى مەن ەۋرازيا ۇلتتىق ۋنيۆەرسيتەتى اراسىنداعى عىلىمي، مادەني ىنتىماقتاستىق ودان سايىن ارتتى.

ءتىپتى، بۇل جاعداي قازاقستان حالقى اسسامبلەياسى جۇمىسىنىڭ جاڭا دەڭگەيگە كوتەرىلۋ كەزەڭىمەن تۇسپا-تۇس كەلدى. ءبىر كەزدە ەۋرازيا ۇلتتىق ۋنيۆەرسيتەتىندە ورنىقتى، تابىستى قىزمەت ىستەپ جۇرگەن عالىمدار فيليالعا تولىق تارتىلدى نەمەسە ەكەۋىندە دە بىردەي جۇمىس ىستەدى. عىلىمي دەڭگەي دە ۇنەمى كوتەرىلىپ وتىردى. مىسالى، تانىمال فولكلورتانۋشىلار، عىلىم كانديداتتارى ت.ۆ.كريۆوششاپوۆا، گ.ي.ۆلاسوۆا اكادەميك س.ا.قاسقاباسوۆتىڭ كەڭەسشىلىگىمەن فيلولوگيا سالاسىنان دوكتورلىق ديسسەرتاسيا قورعاپ، فيليال الەۋەتىن كوتەردى. سونداي-اق، فيليالدا قىزمەت ىستەيتىن تانىمال عالىم، فيزيكا-ماتەماتيكا عىلىمدارىنىڭ دوكتورى ە.د.نۇرسۇلتانوۆ ەۋرازيا ۇلتتىق ۋنيۆەر­سيتەتى عالىمدارىمەن بىرلەسىپ، ىرگەلى عىلىمي جوبالاردى ورىندادى. ءبۇ­گىندە حالىقارالىق رەيتينگتە جوعارى باعا­لاناتىن ەۋرازيا ۇلتتىق ۋنيۆەرسيتەتىنىڭ «ەۋرازيا ماتەماتيك جۋرنالىن» شىعارۋعا ممۋ ماتەماتيكتەرى دە تۇراقتى اتسالىساتىنىن ريزا كوڭىلمەن ايتامىز. ال، ەكى وقۋ ورنى فيلولوگتارى بىرلەسىپ وتكىزەتىن ءداستۇرلى «رۋسيستيكا كۇزگى مەكتەبى» – تاماشا شەبەرلىك الاڭى دەي الامىز. وسىنداي بايلانىس ەكونوميستەر مەن ەكولوگتاردىڭ اراسىندا دا بار. قارىم-قاتىناستىڭ سالالانعانى سول، ءبىز مەملەكەتتىك جوسپارعا ساي، ءممۋ-دىڭ وزىنەن تىكەلەي بىلىكتى پروفەسسورلار شاقىرا باستادىق.

دەسەك تە، كەز كەلگەن وقۋ ورنىنىڭ نە­مەسە ونىڭ بولىمشەسىنىڭ قالىپتاسۋ كەزىن­دە كوپ جاعداي ونى كىم باسقاراتىنىنا قا­تىستى. ستۋدەنتتەردىڭ ساپالى دەڭگەيدە وقۋىن، شىنايى وقۋ ۇدەرىسىن ۇيىمداستىرۋ نەگىزىنەن فيليال باسشىلىعىنا جۇكتەلدى. م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ رەكتورى، اكادەميك ۆ.ا.سادوۆنيچيي ممۋ قازاقستان فيليالىنىڭ ديرەكتورى مىندەتىن سول وقۋ ورنىندا پرورەكتور بولعان پروفەسسور الەكساندر سيدوروۆيچكە جۇكتەسە، ەۋرازيا ۋنيۆەرسيتەتى قۇرىلىمنىڭ ۇلتتىق-حالىقارالىق ماڭىزىن ەسكەرىپ، ديرەكتور ورىنباسارى قىزمەتىنە الەمگە تانىمال ماتەماتيك، اكادەميك مۇحتارباي وتەلبايەۆتى ۇسىندى. ەندىگى جەردە جاڭا استانا ومىرىنە ل.ن.گۋميليەۆ اتىنداعى ەۋرازيا ۇلتتىق ۋنيۆەرسيتەتى قالاي كىرىكسە، م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتى قازاقستان فيليالى دا سولاي تابيعي تۇردە ۇيلەسە باستادى.

قارجى كوزىنە كەلسەك، فيليالعا قازاق­ستان رەسپۋبليكاسى مەملەكەتتىك ءبىلىم تاپسىرىسىن بەرەتىندىكتەن، بارلىق شىعىن رەس­پۋبليكا بيۋدجەتىنەن تولەنەدى. ءبىزدى ۇيلەستىرەتىن تاعى دا ءبىر حالىقارالىق قاۋىم­داستىق بار. ول – ۋنيۆەرسيتەتتەردىڭ ەۋرا­زيالىق اسسوسياسياسى. بۇل ۇيىمنىڭ جەتەك­ءشىسى – ممۋ، ءبىز – ورىنباسار ۋنيۆەر­سيتەتپىز. عىلىم مەن ءبىلىم، ىقپالداستىق پەن اكادەميالىق ەركىندىك ماسەلەسىن تال­قى­لاي­تىن دىلگەر جيىنداردى بىرلەسە وتكىزەمىز.

2003 جىلى 9 ساۋىردە ەۋرازيا ۇلتتىق ۋنيۆەرسيتەتىنىڭ جاڭا وقۋ-زەرتحانالىق عي­ماراتىن اشۋ سالتاناتىنا كەلگەن پرەزيدەنت ن.ءا.نازاربايەۆ: «بۇل وقۋ ورنىنىڭ جانى دا، رۋحى دا ەۋرازيالىق بولاتىنىنا سە­نەمىن. گارۆارد، وكسفورد بىردەن تۇرا قالعان جوق. ۇلكەن ەڭبەكپەن قالىپتاسىپ دامىدى. جوعارى بىلىكتى مامان دايارلاۋ ءۇشىن ەۋرازيا ۋنيۆەرسيتەتىنىڭ ماسكەۋ مەملەكەتتىك ۋنيۆەرسيتەتىمەن، تمد مەن شەتەلدەردىڭ باسقا دا ۋنيۆەرسيتەتتەرىمەن تىعىز بايلانىستا بولۋى اسا ماڭىزدى»، دەپ زور مىندەتتەر جۇكتەپ كەتتى.

وسى جولى ەلباسى ممۋ-دىڭ فيليالىن دا ارالاپ كوردى. بۇعان بايلانىستى فيليال باسشىلىعى ەستەلىك كىتابىندا: «قازاقستان رەسپۋبليكاسى پرە­زيدەنتى ن.ءا.نازاربايەۆتىڭ وسى ءبىر تا­ماشا كۇنى ايتقان كەڭەستەرى مەن نۇسقاۋ­لارى ءبىزدىڭ قارەكەتىمىزدىڭ سيپاتى مەن قاعيداتتارىن شەشۋشى دارەجەدە بەلگىلەپ بەردى»، دەپ جازدى.

سودان بەرگى ون بەس جىلدىڭ ىشىندە ممۋ فيليالى ەلباسى سەنىمىن اقتاپ كەلەدى. بۇل – تاريحي وقۋ ورنىنىڭ عانا ەمەس، ءبىزدىڭ دە قۋانىشىمىز. «ۋاقىت – تارازى» دەگەندەي، فيليالدىڭ قۇرىلىپ جۇمىس ىستەپ، ناتيجەگە جەتۋى رەسەي مەن قازاقستاننىڭ عىلىمي جانە ءبىلىمي بايلانىستارىنىڭ دامۋىنداعى ماڭىزدى كەزەڭ ەكەنى ايدان انىق.

2006 جىلى ەۋرازيا ۇلتتىق ۋني­ۆەر­سي­تەتىندە بۇكىل قازاقستان جاستارىنا ار­ناپ وقىعان دارىسىندە ەلباسى: «ءبىزدىڭ استا­نامىزعا كەلگەن كوپ ەلدىڭ مەملەكەت باسشىلارى ەۋرازيا ۇلتتىق ۋنيۆەرسيتەتىندە ءدا­ءرىس وقىعاندى ماقتانىش سانايدى. ول حالىقارالىق دەڭگەيگە كوتەرىلدى. ونىڭ جانىندا ماسكەۋ مەملەكەتتىك ۋنيۆەر­سي­تەتىنىڭ فيليالى جۇمىس ىستەيدى»، دەگەنى ەسىمىزدە. بۇل تاريحي ءسوز ەكى وقۋ ورنىنىڭ ءارى تابىسىن، ءارى باعدارىن كورسەتتى.

فيليالدىڭ 15 جىلدىق اسۋى – پرە­زي­دەنت ن.ءا.نازاربايەۆتىڭ تاۋەلسىز قازاق­ستان­نىڭ ءبىلىم-عىلىم باعىتىن دامىتۋداعى تۇجىرىمداماسىنىڭ ناتيجەسى. بۇل اسۋ سون­داي-اق، وتاندىق ءبىلىم ىقپالداستىعىن ءورىس­تەتۋدىڭ، ەۋرازيالىق كەڭىستىكتى نىعايتۋدىڭ تابىستى جولىن دا كورسەتىپ وتىر.

ل.ن.گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ ماتەماتيكا، فيزيكا، ەكونوميكا، ەكولوگيا، فيلولوگيا مەكتەبى ءبىلىمنىڭ قوس وزەنىنىڭ الەم مۇحيتىنا قۇيا­تىنىن جاقسى سەزىنەدى. سوندىقتان عالىم­دارىمىزدىڭ ءبىر عىلىمي فورۋم، كون­فەرەنسيا، سەمينار سىندى فورماتتاردا، شاكىرتتەرىمىزدىڭ ورتاق تانىمال عالىم­داردىڭ الدىندا باس قوسقانىن ساتتىلىك دەپ ەسەپتەيدى.

ناقتىراق ايتساق، سوڭعى جىلداردا ستۋدەنتتەر اۋديتورياسىندا ءدارىس وقى­عان ممۋ رەكتورى، اكادەميك ۆ.ا.سا­دوۆ­­نيچييدەن باستاپ، وسى وقۋ ورنىنىڭ ۆ.ن.چۋباريكوۆ، گ.ا.چەچكين، س.د.يكراموۆ، ۆ.ە.بەنينگ، م.م.گولۋبكوۆ، ا.ۆ.لەدەنوۆ، ا.ن.ۆارلاموۆ، ب.ي.بويارينسيەۆ، ۆ.ا.يونسيەۆ، يۋ.ۆ.تارانۋحا، ي.ۆ.كوبزيەۆا، ۆ.ر.بيتيۋكوۆا، يۋ.ل.ما­زۋروۆ، ت.ب. پروفەسسورلارىنىڭ جاڭا­شىل دارىستەرى بىلىمگەرلەرىمىزدى ءتانتى ەتتى.

حالىق «قازاقستانداعى ممۋ» اتاعان ۇلكەن ءبىلىم-عىلىم مەكتەبىنە جىل سايىن باس وقۋ ورنىنان 160 عالىم كەلىپ ءدارىس وقي­دى ەكەن. ال، ەندى وسىندا وقيتىن قازاق­ستاندىق جاستار جوعارى كۋرستاردا ءبىلىمدى ماسكەۋدىڭ وزىنەن بارىپ الاتىنى جانە سوندا ديپلومدىق جۇمىستارىن قورعايتىنى – ەلەۋلى فاكت.

وقىرمان ەسىندە بولاتىن جانە ءبىر مالىمەت: ءممۋ-دىڭ قازاقستان فيليالى ءوز مەملەكەتىمىزدىڭ ءبىلىم جانە عىلىم زاڭدىلىقتارى اياسىندا جۇمىس ىستەيدى. ءبىلىم ۇدەرىسىنە قازاقستان تاريحى، قازاق ءتىلى سەكىلدى ماڭىزدى مىندەتتى پاندەر ەنگى­زىلگەنىن دە ايتا كەتۋ كەرەك.

فيليالدا جىل سايىن «لو­مونوسوۆ وقۋلارى» اتتى حا­لىقارالىق عىلىمي-تەو­ريا­لىق كونفەرەنسيا وتەدى. ونىڭ جۇمىسىنا ەۋرازيا ۋنيۆەر­سيتەتىنىڭ جاس عالىمدارى بەلسەنە قاتىسادى. ستۋدەنت-جاستاردىڭ «ءتاڭىرى»، «پەگاس»، «دوستىق» شىعارماشىلىق بىرلەستىكتەرى دە – قوس وقۋ ورنىنىڭ ءوسۋ جانە تاجىريبە الاڭى. تاياۋدا عانا پايدالانۋعا بەرىلگەن جانە ءبىز بىتىرۋگە كوپ كۇش-جىگەر جۇمساعان 500 ورىندىق «ممۋ قازاقستان فيليالى ستۋدەنتتەر ءۇيى» بۇل رۋحاني باۋىرلاستىقتى ودان ءارى ارت­تىرادى دەپ سەنەمىز.

ممۋ فيليالى باكالاۆرياتىن ءبى­ءتى­رۋشىلەردىڭ 35 پايىزى ماسكەۋ ۋنيۆەر­سي­تە­ءتىنىڭ وزىنە، سپبۋ، جوعارى ەكونوميكا مەك­تەبىنە، شەتەلدەردىڭ تاڭداۋلى وقۋ ورىندارىنا ماگيستراتۋراعا تۇسەدى.

ماسكەۋ مەملەكەتتىك ۋنيۆەرسيتەتىنىڭ قۇرىلىمدىق بولىمشەسى رەتىندە ويداعىداي دامىپ كەلە جاتقان فيليالدىڭ جۇمىس بارىسىن ءبىرىنشى كۇننەن ونىڭ رەكتورى اكادەميك ۆ.ا.سادوۆنيچيي ءجىتى باقىلاپ وتىردى. قالىپتاسقان داستۇرگە ساي جىلىنا بىرنەشە مارتە باس وقۋ ورنىنان فاكۋلتەت دەكاندارىن، مامان دايارلايتىن كافەدرا مەڭگەرۋشىلەرىن ەرتىپ اكەلەدى. وسى ساپارلارىندا ەۋرازيا ۇلتتىق ۋنيۆەرسيتەتى كافەدرالارىمەن بايلانىس ارتا تۇسەدى. تاياۋدا عانا ۆ.ا.سادوۆنيچيي ارنايى كەلىپ، «ستۋدەنتتەر ءۇيىنىڭ» اشىلۋ سالتاناتىنا قاتىستى، ستۋدەنتتەرگە ءدارىس وقىدى، عىلىمي-زيالى قاۋىممەن جۇزدەستى. وسى ساپارىندا ول: «جاستارىمىز ن.ءا.نازاربايەۆتىڭ سەنىمىن اقتايتىنىنا سەنەمىن. ولاردىڭ بىلىمگە ۇمتىلىسى مەن جاۋاپكەرشىلىگى ۇنايدى» دەدى.

راس، ممۋ قازاقستان فيليالىنىڭ جە­ءتىس­تىكتەرىن ەلباسىمىز دا، ەل ۇكىمەتى دە لايىقتى باعالاپ وتىر. قۇرىلىم از جىل­دىڭ ىشىندە قازاقستان ەڭبەك نارى­عىنىڭ سۇرانىسىن ساپالى دەڭگەيدە قاناعات­تاندىرىپ كەلەدى. فيليال تۇلەكتەرى پرە­زيدەنت اكىمشىلىگىندە، مينيسترلىكتەردە، ۇلت­تىق كومپانيالاردا، عىلىم جانە ءبىلىم ۇيىمدارىندا جاۋاپتى قىزمەت ىستەيدى. ولار قازاقستاننىڭ عانا ەمەس، ەۋرازيا كەڭىس­تىگىنىڭ دامۋىنا ۇلەس قوسىپ ءجۇر. وسىنى ەسكەرىپ، استانا قالاسى اكىمدىگى ەلور­دانىڭ كورنەكتى جەرىنەن وقۋ عيماراتىن سالۋعا جەر تەلىمىن ءبولدى. بۇيىرسا، قوس ۋني­ۆەر­سيتەت تە كەڭەيەتىن كۇن الىس ەمەس. نيەت – ءتۇزۋ، ىزدەنىس – مول، الەۋەت – زور، جاۋاپ­كەرشىلىك – بيىك.

ەلباسىمىز ءبىر سوزىندە: «قولىمىزدان – قاي­رات، سانامىزدان اقىل كەتپەسە، جاق­سىلىققا جەتەرىمىز حاق» دەپ ەدى. وتانى­مىزدىڭ جاقسىلىعى ءۇشىن اشىلىپ، ءبىلىم كەڭىستىگىندە ءوز جولىن تاپقان ءارى كورشى، ءارى تامىرلاس وقۋ ورنى جاۋاپتى كەزەڭدە بيىك دەڭگەيدەن كورىنە بەرسىن دەپ ارىپتەستىك تىلەگىمىزدى جەتكىزەمىز.

دەرەككوز: "ەگەمەن قازاقستان" گازەتى