مارقۇم ءانشىنىڭ ارتىنان قالعان جارى مەن ۇلى ۇيسىز-كۇيسىز كۇن كەشىپ جۇرگەنى تۋرالى باتىرحاننىڭ جاقىن دوسى، جورنالشى وتار كۋشاناشۆيلي prozvezd.info پورتالىنا مالىمدەگەن.

            «اقش-تا ونىڭ ايەلى مەن ەرەسەك بالاسى قالدى. اقيقاتىن باسىنان اشىپ الايىق. كاتيا دا، ولاردىڭ ۇلى دا وتانىنا قايتۋدان ۇزىلدى-كەسىلدى باس تارتىپ وتىر. ولاردىڭ ۇيلەرى سالىنىپ بىتۋگە تاياۋ. تاياۋ، ءبىراق ءۇي سوڭىنا دەيىن سالىنباعان. ال اقش-تا اقشاڭ بولماسا تايىپ تۇر دەيتىن قاعيدا بار. ولار ءقازىر دوستارىنىڭ ءۇيىن پانالاۋدا»،-دەدى رەسەيلىك شوۋمەن.

            العاشىندا باتىرحان شۇكەنوۆ جۇبايى مەن بالاسىنىڭ شىعىنىن ءوزى تولەپ وتىرعان. ءدال ءقازىر ونىڭ وتباسىندا ونداي مۇمكىندىك جوق ەكەن. بۇل اقپاراتتى «قامشى» پورتالى NUR.KZ-كە سىلتەمە جاساي وتىرىپ حابارلايدى. قازىرگى تاڭدا بۇل ماسەلەنى باتىرحان شۇكەنوۆتىڭ ديرەكتورى شەشۋگە تىرىسىپ جاتىر.

            قازىرگى تاڭدا باتىردىڭ 14 جاستاعى ۇلى ماقسۇت شۇكەنوۆ پەن كاتيا اقش-تىڭ فلوريدا شتاتىنداعى ساراسوتا قالاسىندا تۇرادى. باتىرحان ءوزىنىڭ ۇلىنا ۇلكەن ءۇي سالىپ بەرگىسى كەلگەن ەكەن. ءتىپتى قۇرىلىسقا اقشا دا سالعان. ءبىراق ول مەزگىلسىز ومىردەن ءوتىپ كەتكەنىنە بايلانىستى، قۇرىلىس جۇمىستارى توقتاپ قالعان.

            «ءبىز ءقازىر بۇل ماسەلەنى شەشۋگە تىرىسىپ جاتىرمىز. باتىرحان شۇكەنوۆ اتىنداعى قوعامدىق قور ارقىلى بىرنەشە جوبالاردى جۇزەگە اسىرىپ، ءسال دە بولسا باتىردىڭ وتباسىنا كومەكتەسپەك ويىمىز بار. ۇلكەن ءۇي الا الماسىمىز انىق. ءبىراق شاعىن پاتەر الىپ بەرسەك پە دەيمىز. ءقازىر ءانشىنىڭ اتىنداعى قوعامدىق قور جۇمىس جاساپ جاتىر. الايدا، ەشكىم قولداۋ كورسەتپەۋدە. دەمەۋشى دە جوق، مەسەناتتار دا كورىنبەيدى. تەك 40 شاقتى قاراپايىم ادامداردىڭ ارقاسىندا 1600 اقش دوللارىن جيناعانىمىز بولماسا»،-دەدى مارقۇم ءانشىنىڭ ديرەكتورى ولجاس بايكانوۆ.

            ديرەكتوردىڭ سوزىنە سەنسەك،  ول باتىرحاننىڭ ءانتاسپاسىن قايتا شىعارۋعا مۇددەلى. ونىڭ ۇستىنە ەسكە الۋ كونسەرتتەرى دە بار.

            ەستەرىڭىزگە سالا كەتەيىك، ەلىمىزدىڭ ەڭ بەلدى مۋزىكانتتارىنىڭ ءبىرى باتىرحان شۇكەنوۆ وسى جىلدىڭ ءساۋىر ايىندا جۇرەك تالماسىنان مارقۇم بولان.

            P.S. باتىرحان شۇكەنوۆ ومىردەن وتكەندە ەل ءدۇر سىلكىنگەنى ەسىمىزدە. قازاقستان مەن رەسەيدىڭ بارلىق جەرىندە انشىگە دۇعا باعىشتالىپ،  ونى قابىرعاسى قايىسا جوقتاعاندار كوپ بولدى. ءانشىنىڭ دوسى مەن ديرەكتورى قانداي ەمەۋرىن ءبىلدىرىپ وتىر؟ارتىندا قالعان شاڭىراعى ەلگە امانات دەگەنى مە؟ ەندەشە ولار نەگە وتانىنا ورالمايدى؟ ءبىز ءۇشىن ارداقتى ەسىمگە اينالعان ءانشىنىڭ اتىن قولدانىپ، اقشاعا اينالدىرۋ قانشالىقتى دۇرىس؟

ايان مەيراش