ءپۋتيننىڭ ۋرالسك فەدەرالدىق وكرۋگىندەگى وكىلى ۆلاديمير ياكۋشيەۆ رەسەيدىڭ كۋرگان، تيۋمەن وبلىستارىنداعى سۋ تاسقىنىن قازاقستانمەن بايلانىستىردى. بۇل تۋرالى ول ربك باسىلىمىنا بەرگەن سۇحبات بارىسىندا ايتتى.
ونىڭ سوزىنشە، ەكى وبلىستاعى تاسقىن ماسەلەسىن شەشۋ ءۇشىن قازاقستان سۋ قويمالارى جۇيەسىندەگى سۋ جىبەرۋ ماسەلەسىن رەسەيمەن اقىلداسىپ وتىرۋى كەرەك.
ۆلاديمير ياكۋشيەۆتىڭ بۇل مالىمدەمەسى سوقتىعۋعا قارا تاپپاي وتىرعان ارانداتۋشىنىڭ ارەكەتىنە ۇقسايدى. ويتكەنى ول ايتىپ وتىرعان وبلىستاردى باسىپ وتەتىن توبىل وزەنىنىڭ اعىسى قازاقستاننان ەمەس، رەسەيدەن باستالادى.
سۋ رەسۋرستارى جانە يرريگاسيا مينيسترلىگى قازاقستان رەسەيدەگى سۋ تاسقىنىنا اسەر ەتەدى دەۋ شىندىققا جاناسپايتىنىن ءمالىم ەتتى.
"توبىل وزەنىنىڭ بويىنداعى سۋ رەسەيدەن كەلەدى. تيىسىنشە، سۋ جىبەرۋ تۋرالى شەشىم رەسەي تاراپىنان كەلەتىن اعىنعا ساي قابىلدانادى. سوندىقتان، قازاقستان رەسەيدەگى سۋ تاسقىنىنا اسەر ەتەدى دەپ ايتۋ دۇرىس ەمەس. بۇل شىندىققا جاناسپايدى. 2 ساۋىردەن باستاپ قازاقستان جاعى رەسەي تاراپىنا توبىل وزەنى بويىنشا سۋ وتكىزۋ جونىندەگى شەشىمدەر تۋرالى اقپارات بەرىپ وتىر. تاراپتار تاۋلىك بويى سۋ اعىنىنىڭ ۇلعايۋىنا نەمەسە ازايۋىنا قاراي مالىمەت الماسادى. سول سەبەپتى كەز-كەلگەن كەلىسىلمەگەن ارەكەت تۋرالى ءسوز جوق" دەپ حابارلادى مينيسترلىك.
رەسەي شەندىلەرىنىڭ قازاقستان تۋرالى داۋلى مالىمدەمەلەرى تىيىلماي تۇر. جۋىردا عانا مەملەكەتتىك دۋما دەپۋتاتى اندرەي لۋگوۆوي قازاقستان تۋرالى "پاتشانىڭ جەكە دۇشپانى. قازاقستان بۇرالاڭى" اتتى دەرەكتى فيلم جارىققا شىعارىپ، قازاقستاندى "انگلوساكستار باقىلاۋىنداعى ەل"، "رۋسسوفوبيا مەكەنى" دەپ پىكىر بىلدىرگەن. ۋكراينا مەن قازاقستاندى سالىستىرا كەلە ول "ەلدى اعىلشىندار بيلەپ تۇر، ولاردىڭ نەگىزگى ماقساتى – ورىس قازاق اراسىنا وت جاعۋ" دەيدى.
پىكىر قالدىرۋ