جالپىۇلتتىق سوسيال دەموكراتيالىق پارتياسىنىڭ ماجىلىستەگى ءبىر توپ وكىلى ۆيسە-پرەمەر تامارا دۇيسەنوۆاعا ەلدەگى كۇنكورىس دەڭگەيىن 115 مىڭ تەڭگەگە دەيىن كوتەرۋدى سۇراپ، دەپۋتاتتىق ساۋال جولدادى.

رەسپۋبليكا بويىنشا باعاعا مونيتورينگ جۇرگىزگەن پارتيا وكىلدەرى ستاتيستيكا ورگاندارىنىڭ دۇرىس مالىمەت بەرمەي وتىرعانىن مالىمدەدى. ولاردىڭ ايتۋىنشا، ازىق-تۇلىك ونىمدەرىنىڭ ەڭ از جيىنتىعىنىڭ 2175 ككال تاۋلىكتىك ەنەرگەتيكالىق قۇندىلىعىن قامتاماسىز ەتەتىن 43 ءتۇرلى ازىق-تۇلىك ونىمدەرىنىڭ سەبەتى نورماعا ساي كەلمەيدى.

"ازىق-تۇلىك قورجىنىنا 2175 ككال تاۋلىكتىك قۋات بەرەتىن ازىق-تۇلىك ونىمدەرىنىڭ 43 ءتۇرى ەنگىزىلگەن. ءبىز بۇل ساندى ساپاسى جاعىنان وتە از، حالىقارالىق ستاندارتتارعا، سونداي-اق قازاقستاندىقتاردىڭ مادەني جانە ءداستۇرلى تاماقتانۋىنا سايكەس كەلمەيدى، ولاردىڭ دەنساۋلىعىنا ءقاۋىپ توندىرەدى دەپ سانايمىز”، – دەلىنگەن دەپۋتاتتىق ساۋالدا. 

دەپۋتاتتار ەلدەگى كۇنكورىس مينيمۋمىن 115 710 تەڭگەگە دەيىن كوتەرۋدى سۇرادى. سەبەبى بيىل مامىر ايىنىڭ باسىندا رەسپۋبليكا بويىنشا ازىق-تۇلىكتىڭ ورتاشا مولشەرى ولاردىڭ ەسەپتەۋى بويىنشا 63 641 تەڭگە بولعان.

سونىمەن قاتار دەپۋتاتتار وسى ماسەلەنى ەگجەي-تەگجەيلى سارالايتىن ارنايى جۇمىس توبىن قۇرۋدى ۇسىندى.

"جوعارىدا ايتقانىمىزداي، مەملەكەتتى الەۋمەتتىك قورعاۋعا جاڭا كوزقاراس قاجەت. سوندىقتان ءبىز پارتيا ماماندارىنىڭ قاتىسۋىمەن حالىقارالىق ستاندارتتار مەن ۇلتتىق مادەني قاجەتتىلىكتەرگە جاۋاپ بەرە الاتىن ازىق-تۇلىك قورجىنىن ازىرلەۋگە ارنايى جۇمىس توبىن قۇرۋدى ۇسىنامىز"، – دەلىنگەن اسحات راحىمجانوۆ، نۇرلان اۋەسبايەۆ، اجار ساعىندىقوۆا، ناۋرىز سايلاۋباي جولداعان دەپۋتاتتىق ساۋالدا.

ايتا كەتسەك، قازاقستاندا وسى جىلدىڭ ءساۋىر ايىندا ەڭ تومەنگى كۇنكورىس دەڭگەيى ايىنا 48 897 تەڭگەنى قۇراعان.