ساۋدا جانە ينتەگراسيا ءمينيسترىنىڭ مىندەتىن اتقارۋشى قايرات تورەبايەۆ ءماجىلىس كۋلۋارىندا ءبىرىڭعاي ۋاقىت بەلدەۋىن الىپ تاستاپ، بۇرىنعى ۋاقىت بەلدەۋىنە قايتىپ كەلۋدى سۇراعان پەتيسيا تۋرالى ايتتى. 

ونىڭ ايتۋىنشا، 50 مىڭنان استام داۋىس جينالاتىن بولسا، ۇكىمەت پەتيسيانى قاراستىرۋى مۇمكىن. 

-رەگلامەنتكە سايكەس ءبىز ەڭ الدىمەن، پەتيسيانىڭ ناتيجەسىن كۇتۋىمىز قاجەت. ودان كەيىن مۇنى جۇمىسقا الامىز. بۇگىندە بۇل تۋرالى ايتۋ ەرتە. ءقازىر مينيسترلىكتىڭ وسىعان قاتىستى ۇستانىمىن ايتۋعا بولمايدى. ازىرگە باسقا مەملەكەتتىك ورگاندارمەن بىرلەسىپ قابىلدانعان رەسمي پوزيسيانى ۇستانىپ وتىرمىز. بۇل ماسەلەگە پەتيسيا اياقتالعان سوڭ ورالامىز، بىلۋىمشە، ول زاڭدى تۇردە وسى جىلدىڭ جەلتوقسانىنا دەيىن اياقتالۋعا ءتيىس"، - دەيدى.

ەسكە سالساق، بيىل 29 اقپاندا قازاقستان ءبىرىڭعاي UTC +5 ۋاقىت بەلدەۋىنە رەسمي تۇردە اۋىسقان بولاتىن. ەلىمىزدىڭ بىرنەشە وڭىرىندە ۋاقىت ءبىر ساعاتقا ارتقا جىلجىدى. اتاپ ايتقاندا، استانا، الماتى، شىمكەنت قالالارىندا، اقمولا، الماتى، جامبىل، قاراعاندى، قوستاناي، پاۆلودار، سولتۇستىك قازاقستان، تۇركىستان، شىعىس قازاقستان، اباي، جەتىسۋ، ۇلىتاۋ وبلىستارىندا جەرگىلىكتى ۋاقىت ءبىر ساعاتقا ارتقا قويىلدى.