ءتيىستى قاۋلىعا پرەمەر-مينيستر ولجاس بەكتەنوۆ قول قويدى.

وبلىستاردىڭ، رەسپۋبليكالىق ماڭىزى بار قالالاردىڭ جانە استانانىڭ بيۋدجەتتەرىنە 351 مىڭنان استام دوزاسى مولشەرىندە ۆاكسينا ساتىپ الۋ ءۇشىن  9،7 ملرد تەڭگەدەن استام قاراجات اۋدارىلادى.

ادام پاپيللوماسى ۆيرۋسىنان تۋىنداعان جاتىر موينى وبىرى (جمو) – الەمدەگى ەڭ كوپ تارالعان قاتەرلى ىسىكتەردىڭ ءبىرى. اتالعان ۆيرۋس انىقتالعان بارلىق جاعدايدىڭ قۇرىلىمىندا 13،1%-عا دەيىن كەزدەسەدى. جىل سايىن ودان 300 مىڭعا جۋىق ايەل كوز جۇمادى.

قازاقستاندا جاتىر موينى وبىرى بارلىق جاستاعى ايەلدەر اراسىندا قاتەرلى ىسىكتىڭ باسقا تۇرلەرى ىشىندە تارالۋى بويىنشا ەكىنشى ورىندا تۇر. ال جىل سايىن رەسپۋبليكا بويىنشا 1900-گە جۋىق جاڭا جاعداي تىركەلەدى، 600-دەن استام ايەل وسى پاتولوگيادان قايتىس بولادى.

«اپۆ-نا قارسى جانە جمو دامۋىمەن كۇرەسۋدىڭ جالعىز ءادىسى – ۆاكسيناسيا. ۇلتتىق ۆاكسيناسيا كۇنتىزبەسىنە سايكەس جانە دۇنيەجۇزىلىك دەنساۋلىق ساقتاۋ ۇسىنىمىن ەسكەرە وتىرىپ، اپۆ-عا قارسى ەكپە سالۋ 11 جاستاعى قىزدارعا 6 اي ارالىق مەرزىممەن ەكى رەت جۇرگىزىلەتىن بولادى. بۇل رەتتە قازاقستاندا اپۆ-نىڭ نەعۇرلىم ونكوگەندى تۇرلەرىنەن (6، 11، 16، 18) قورعايتىن ءتورت ۆالەنتتى ۆاكسينا قولدانىلادى»، دەلىنگەن ۇكىمەت حابارلاماسىندا.