الماتى قالاسىندا "قارىزسىز قوعام" جوباسى اياسىندا 12 مىڭ قالا تۇرعىنىن قارجىلىق ساۋاتتىلىققا وقىتاتىن بولادى. الماتىدا جوبا 2024 جىلدىڭ 5 اقپانىنان باستاپ جۇزەگە اسىپ كەلەدى. بۇل اقپاراتتى الماتى قالاسىنىڭ وڭىرلىك كوممۋنيكاسيالار قىزمەتىنىڭ الاڭىندا جوبانىڭ باستاماشىلارى حابارلادى. 

"AMANAT" پارتياسى ىسكە قوسقان "قارىزسىز قوعام" جوباسى پروبلەمالىق كرەديتتەر مەن قارىزدار سالدارىنان قيىندىقتارعا تاپ بولعان قازاقستاندىقتاردى قولداۋ ماقساتىندا ءوتىپ جاتىر. "قارىزسىز قوعام" جوباسى باستالعاننان بەرى قالانىڭ 3500 تۇرعىنى ءوز قارجىسىن باسقارۋدى، قارىز شىرماۋىنان شىعۋدى ۇيرەندى. الماتىدا جوبا 2024 جىلدىڭ 5 اقپانىنان باستاپ قالالىق اكىمشىلىكپەن بىرلەسكە تۇردە، ءار اۋداندا جەكە جۇزەگە اسىرىلىپ جاتىر.

"AMANAT" پارتياسىنىڭ الماتى قالالىق فيليالى ءتوراعاسىنىڭ ورىنباسارى قۋانىش تولەپوۆ مەملەكەت باسشىسى ءوزىنىڭ قازاقستان حالقىنا جولداۋىندا جوبانىڭ ماڭىزدىلىعىن جانە ونى ەلىمىزدىڭ بارلىق وڭىرلەرىندە كەڭەيتۋ قاجەتتىگىن اتاپ ءوتتى.

"بيىل جوبا بويىنشا ەلىمىزدىڭ بارلىق وڭىرىندە 200 مىڭ ادامدى، ونىڭ ىشىندە الماتى قالاسىنىڭ 12 مىڭ تۇرعىنىن وقىتۋ جوسپارلانىپ وتىر. قازىرگى ۋاقىتتا قالا اكىمدىگىمەن بىرلەسە قالامىزدىڭ 6 مەكەن-جايى بويىنشا وقىتۋ وتكىزىلۋدە. الماتى قالاسىنا 6 قارجى ساراپشىسى بەكىتىلگەن. ولار تۇسكە دەيىن جالپى باعدارلاما، تۇستەن كەيىن قاتىسۋشىنىڭ قالاۋى بويىنشا جەكە كەڭەستەر بەرەدى. جوبا قالانىڭ 8 اۋدانىن قامتيدى. وقىتۋ 5 كۇن بولادى. وسى ۋاقىت ىشىندە قاتىسۋشىلار وتباسىلىق بيۋدجەتتى جۇرگىزۋدى، شىعىندارىن باسقارۋدى، نەسيەلىك قارىزداردى مەرزىمىنەن بۇرىن وتەۋ بويىنشا ۇسىنىستار الۋدى، ءتيىمدى شارتتارمەن نەسيە تاڭداۋدى، دەپوزيتتەردىڭ ءارتۇرلى شارتتارىمەن تانىسۋدى، ءىرى ساتىپ الۋلاردى جوسپارلاۋدى ۇيرەنەدى"، - دەدى ق.تولەپوۆ.

جوبا باستالعاننان بەرى قازىرگى ۋاقىتقا دەيىن 11 رەت وقىتىلىپ، بارلىعى 3500-دەن استام قاتىسۋشى قارجىلىق ساۋاتتىلىق بويىنشا ءبىلىمىن ارتتىردى. 

وقىتۋ بارىسىندا قارجى ساراپشىلارى جەكە كونسۋلتاسيالار وتكىزەدى جانە قاتىسۋشىلاردىڭ قالاۋى بويىنشا ءوز بيزنەسىن اشۋ ءۇشىن مەملەكەتتىك گرانتتىق جانە كرەديتتىك باعدارلامالارعا بيزنەس-جوسپار جازۋعا كومەكتەسەدى. جوبا اياسىندا قاتىسۋشىلار زاڭگەر كومەگىنە دە جۇگىنە الادى. زاڭگەرلەر  شوتتارىنا تىيىم سالىنعان، قارىزدارى كوللەكتورلىق كومپانياعا ساتىلعان جاعدايدا نەمەسە نەسيەلىك قارىزدى قايتا قۇرىلىمداۋ بويىنشا تۇرعىندارعا كومەك كورسەتەدى. قازىرگى تاڭدا ءبىر توپتا 100 ادامعا دەيىن كۋرستان ءوتىپ جاتىر.

"قارىزسىز قوعام" جوباسى قارىزعا بەلشەدەن باتىپ، ءۇمىتىن ۇزگەندەرگە ناقتى قولداۋ كورسەتەدى. جوبا قولدا بار قاراجاتقا ءومىر سۇرۋگە، قاجەتسىز نەسيەدەن باس تارتۋعا ۇيرەتەدى. ءبارىن وسى جوباعا قاتىسىپ، ءوزىنىڭ قارجىلاي ساۋاتتىلىعىن ارتتىرۋعا شاقىرامىن"، - دەدى ق.تولەپوۆ بيفينگتە.

وقىتۋ بارىسىندا ازاماتتار قارىز قۇرساۋىنان شىعىپ، قارجىسىن دۇرىس باسقارۋدى ۇيرەنەدى. بۇل ءوز كەزەگىندە قوعامداعى جالپى ەكونوميكالىق تۇراقتىلىقتى جاقسارتۋعا ىقپال ەتەدى دەپ كۇتىلىپ وتىر.

تەگىن كۋرستار مەن وقۋدان وتۋگە نيەت بىلدىرۋشىلەر تۇرعىلىقتى جەرى بويىنشا "AMANAT" پارتياسىنىڭ اۋداندىق فيليالىنا نەمەسە اۋدان اكىمدىكتەرىنە جۇگىنە الادى. قاتىسۋشىلارعا ىڭعايلى بولۋ ءۇشىن ونلاين پلاتفورما دا ىسكە قوسىلعان.