ەلىمىزگە مەملەكەتتىك ساپارمەن كەلگەن كورەيا رەسپۋبليكاسىنىڭ پرەزيدەنتى يۋن سوك ءولدى «اقوردا» رەزيدەنسياسىندا سالتاناتتى تۇردە قارسى الۋ ءراسىمى ءوتتى.

اۋەلى قاسىم-جومارت توقايەۆ پەن يۋن سوك ءول بىر-بىرىنە رەسمي دەلەگاسيا مۇشەلەرىن تانىستىردى. سودان كەيىن قۇرمەت قاراۋىلىنىڭ باستىعى مەملەكەتتەر باسشىلارىنا راپورت بەرىپ، ەكى ەلدىڭ ءانۇراندارى ورىندالدى.

سالتاناتتى قارسى الۋ راسىمىنەن سوڭ پرەزيدەنتتەر شاعىن قۇرامدا كەلىسسوز جۇرگىزۋ ءۇشىن شىعىس زالىنا باردى.

قاسىم-جومارت توقايەۆ ءوزىنىڭ شاقىرۋىن قابىل الىپ، ەلىمىزگە ساپارمەن كەلگەنى ءۇشىن كورەيالىق ارىپتەسىنە العىس ايتتى. سونداي-اق مۇنى ەكى ەل اراسىنداعى ىنتىماقتاستىقتى نىعايتۋعا دەگەن شىنايى نيەتتىڭ ايقىن كورىنىسى دەپ باعالايتىنىن جەتكىزدى.

– بۇگىنگى ساپاردىڭ قوس تاراپ ءۇشىن دە ءمان-ماڭىزى زور. كورەيا رەسپۋبليكاسى – ءبىز ءۇشىن سەنىمدى سەرىكتەس ءارى ستراتەگيالىق ارىپتەس. ەكى ەلدىڭ دوستىق داستۇرگە نەگىزدەلگەن قارىم-قاتىناسى تەرەڭنەن تامىر تارتادى. ءبىز بارلىق دەڭگەيدە تىعىز بايلانىس ورناتتىق. كۇن تارتىبىندەگى ماسەلەلەر ىسكەرلىك رۋحتا جانە سىندارلى نەگىزدە شەشىمىن تاۋىپ كەلەدى. قازىرگى تاڭدا ەكى ەل اراسىنداعى تاۋار اينالىمىنىڭ كولەمى 6 ميلليارد دوللارعا جەتتى. بۇل – ورتاق كۇش-جىگەردىڭ جەمىسى. اۋقىمدى ەكونوميكالىق جوبالاردى ىسكە اسىردىق. ينۆەستيسيالىق ىقپالداستىق جىلدان-جىلعا نىعايىپ كەلەدى. ءقازىر قازاقستاندا وڭتۇستىك كورەيانىڭ كاپيتالى بار 700-دەن استام بىرلەسكەن كاسىپورىن جۇمىس ىستەيدى. مادەني-گۋمانيتارلىق بايلانىستارىمىز قارقىندى دامىپ جاتىر. قازاقستانداعى كورەي دياسپوراسى بۇل ۇدەرىستە ماڭىزدى ءرول اتقارادى. ونى ەكى حالىقتىڭ اراسىن جالعاپ وتىرعان التىن كوپىر دەۋگە بولادى. ءبىز وسى جەتىستىكتەردى ەسەلەپ، قازاق-كورەي ىنتىماقتاستىعىن جاڭا دەڭگەيگە كوتەرۋگە مۇددەلىمىز. بۇل ساپار ەكى ەلدىڭ ىنتىماقتاستىعىنا تىڭ سەرپىن بەرەتىنىنە سەنىمدىمىن، – دەدى قاسىم-جومارت توقايەۆ.