كەزدەسۋدە تاراپتار ەنەرگەتيكا سالاسىنداعى بىرلەسكەن جوبانى جۇزەگە اسىرۋ ماسەلەلەرىن تالقىلادى.
ەلشى ن.مۇحامەتالى ۇلى قازاقستان 2060 جىلعا دەيىن كومىرتەگى بەيتاراپتىعىنا قول جەتكىزۋدى، سونداي-اق 2030 جىلعا دەيىن جاڭارتىلاتىن ەنەرگيا كوزدەرىنىڭ ۇلەسىن 4 پايىزدان 15 پايىزعا دەيىن ارتتىرۋدى كوزدەپ وتىرعانىنا نازار اۋدارىپ، «Masdar» كومپانياسىنىڭ قازاقستاندا قۋاتتىلىعى 1 گۆت جەل ەلەكتر ستانساسىن سالۋ جونىندەگى جوبانىڭ ماڭىزدىلىعىنا توقتالدى، دەلىنگەن حابارلامادا.
ءوز كەزەگىندە مۇحاممەد ءال-راماحي قازاقستاننىڭ جاسىل ەنەرگەتيكانى دامىتۋ سالاسىنداعى الەۋەتى زور ەكەنىن جانە «Masdar» بۇل جوبانى ءساتتى ءارى ناتيجەلى ىسكە اسىرۋعا مۇددەلى ەكەنىن اتاپ ءوتتى.
كەزدەسۋدىڭ قورىتىندىسى بويىنشا تاراپتار اتالعان جوبانى ىسكە اسىرۋ باعىتىندا بىرلەسىپ جۇمىس اتقارۋ تۋرالى ۋاعدالاستىققا قول جەتكىزدى.
پىكىر قالدىرۋ