ق ر پرەمەر-مينيسترى ولجاس بەكتەنوۆ پاۆلودار، ەكىباستۇز جانە اقسۋ قالالارىندا جىلۋ جەلىلەرىن سالۋعا جانە رەكونسترۋكسيالاۋعا ۇكىمەت رەزەرۆىنەن 9 ملرد تەڭگە ءبولۋ تۋرالى قاۋلىعا قول قويدى.

وسىلايشا، پاۆلوداردا (3،6 ملرد تەڭگە) ۇزىندىعى 2،5 شاقىرىم بولاتىن تم-13 جىلۋ ماگيسترالى سالىنادى. بۇل 41،5 مىڭ ادام تۇراتىن پاۆلوۆ – شيەۆچەنكو – كاتايەۆ كوشەلەرى ورنالاسقان اۋدانداعى كوپپاتەرلى تۇرعىن ۇيلەردى تۇراقتى جىلۋمەن قامتاماسىز ەتۋگە مۇمكىندىك بەرەدى.

ەكىباستۇزدا جالپى ۇزىندىعى شامامەن 4 شاقىرىم (3،6 ملرد تەڭگە) بولاتىن تم-1 جانە تم-3 جىلۋ ماگيسترالدارىنىڭ ۋچاسكەلەرى رەكونسترۋكسيالانادى. وسى جۇمىستىڭ ارقاسىندا جاڭا تۇرعىن ۇيلەردى، الەۋمەتتىك مەكەمەلەردى، شاعىن جانە ورتا بيزنەس نىساندارىن قوسۋ كوزدەلگەن. بۇل 2 مىڭنان استام ادامدى قامتيدى. 

قالعان 1،8 ملرد تەڭگە اقسۋداعى №3،5 جانە 8 ىقشام اۋدانداردا ورنالاسقان، ۇزىندىعى 4،3 شاقىرىم بولاتىن ورامىشىلىك جىلۋ جەلىلەرىن قايتا جاڭارتۋعا اۋدارىلادى. سوڭعى 2 جىلدا اتالعان ۋچاسكەلەردە 40-تان استام اقاۋ تىركەلگەن. رەكونسترۋكسيا جۇمىسى 1،5 مىڭنان استام جەرگىلىكتى تۇرعىندى ساپالى جىلۋمەن قامتاماسىز ەتۋگە مۇمكىندىك بەرەدى.

پاۆلودار وبلىسى اكىمدىگىنىڭ دەرەكتەرىنە سايكەس، بۇگىنگى تاڭدا پاۆلوداردا جىلۋمەن جابدىقتاۋ جەلىلەرىنىڭ ۇزىندىعى 828،1 كم (ورتاشا توزۋ – 82،8%)، ەكىباستۇزدا – 422،5 كم (90،7%)، اقسۋدا – 99،1 كم (59%) قۇرايدى. تەحنيكالىق تەكسەرۋ ناتيجەلەرى بويىنشا شۇعىل جۇمىستار جۇرگىزىلۋى ءتيىس، توزۋ دەڭگەيى اسا جوعارى 4 ۋچاسكە انىقتالدى.