بيلىك باسىنداعىلار جاستاردىڭ تۇرمىسىن جاقسارتۋعا بارلىق جاعداي جاسالعان دەپ ەسەپتەيدى. قازاقستان ازاماتى باسپانا الاردا مەملەكەتتىك بيۋدجەتتىڭ مۇمكىندىكتەرىن ەسكەرۋى كەرەك دەگەن پىكىردە. بۇل تۋرالى Stan.kz اقپارات اگەنتتىگى حابارلادى.
ءماجىلىس دەپۋتاتى داۋلەت مۇقايەۆ پرەمەر-مينيستردىڭ ورىنباسارى قانات بوزىمبايەۆقا قازاقستانداعى جاستاردى تۇرعىن ۇيمەن قامتاماسىز ەتۋدىڭ جاڭا باعدارلاماسىن ازىرلەۋدى ۇسىندى. داۋلەت مۇقايەۆ ءوزىنىڭ دەپۋتاتتىق ساۋالىندا قازاقستان مەگاپوليستەرىنىڭ تۇرعىندارى باسپاناسىز جۇرگەنىن ايتتى. 2019 جىلدان بەرى استانا، الماتى جانە شىمكەنت قالالارىندا ۋاقىتشا جالدامالى پاتەرلەردە تۇراتىن جاستاردىڭ سانى 10 مىڭعا جەتكەن.
“پاتەر جالداپ تۇراتىن جاستاردىڭ اقشا جيناپ، باسپانا الۋعا مۇمكىندىگى جوق. 2019 جىلدان باستاپ ينفلياسيا دەڭگەيى كوتەرىلىپ، تۇرعىن ءۇي باعاسى جىلدان جىلعا ءوسىپ جاتىر. وسىدان بەس جىل بۇرىن ەلىمىزدە پاتەردىڭ شارشى مەترىنىڭ قۇنى 200 مىڭ تەڭگە بولسا، ءقازىر 400 مىڭعا جۋىقتادى. ونىڭ قۇنى ەكى ەسە ارتتى. شىنىندا ادامدار باسپاناعا اقشا جيناۋدان بۇرىن، قىمباتشىلىقتىڭ كەسىرىنەن كۇن كورىس ءۇشىن جانتالاسىپ ءجۇر”، – دەيدى دەپۋتات.
“باسپاناعا سۇرانىس جىل سايىن ءوسىپ كەلە جاتقانىن ەسكەرە وتىرىپ (بۇگىندە كەزەكتە شامامەن 650 مىڭ ادام تۇر) مۇندا مۇقتاج ءارى الەۋمەتتىك وسال توپتارىنا باسىمدىق بەرىلەدى. بۇگىندە جۇمىس ىستەيتىن جاستاردىڭ تۇرمىستىق جاعدايىن جاقسارتۋعا ارنالعان ءتۇرلى باعدارلامالار بار"، – دەيدى پرەمەر-مينيستردىڭ ورىنباسارى.
2019 جىلدان باستاپ استانا، الماتى جانە شىمكەنت قالالارىندا دا جۇمىس ىستەيتىن جاستارعا ساتىپ الۋ قۇقىعىنسىز پاتەرلەر جالعا بەرىلىپ كەلەدى. ياعني، جاستارعا جالداۋ اقىسىن تولەمەي، بەلگىلى مەرزىمدە ءۇي ساتىپ الۋ ءۇشىن اقشا جيناۋعا مۇمكىندىك بار.
قانات بوزىمبايەۆ بۇل باعدارلاما 2019 جىلدان باستاپ ىسكە قوسىلعانىن جانە ونىڭ الداعى ۋاقىتتا دا جالعاساتىنىن ايتتى. الايدا ونىڭ سوزىنشە ۇكىمەت جاستارعا جالعا بەرىلەتىن پاتەرلەردى ساتىپ الۋ قۇقىعىن بەرۋ ماسەلەسىن قاراستىرمايدى.
“جالعا الۋشىلاردىڭ ءجيى اۋىسۋى جانە جاڭا جالعا بەرىلەتىن پاتەرلەر سالۋ ەسەبىنەن بۇل تەتىك تۇرعىن ۇيگە مۇقتاج ازاماتتاردىڭ كوبىن بارىنشا قامتۋعا مۇمكىندىك بەرەتىنىن اتاپ وتكەن ءجون. تەتىكتى ودان ءارى ىسكە اسىرۋ ءۇشىن 2023-2025 جىلدارعا اتالعان قالالاردا قوسىمشا 9 مىڭ جالعا بەرىلەتىن پاتەر (جىل سايىن 3 مىڭ پاتەر) ساتىپ الۋ ءۇشىن جەرگىلىكتى بيۋدجەتتەردەن 96،9 ملرد تەڭگە مولشەرىندە قاراجات ءبولۋ جوسپارلانىپ وتىر"، – دەدى قانات بوزىمبايەۆ.
