ماڭعىستاۋ وبلىسىنىڭ پروكۋراتۋراسى ەكونوميكالىق تەرگەۋ دەپارتامەنتى، سىبايلاس جەمقورلىققا قارسى قىزمەت مۇناي كاسىپورىندارىندا تەكسەرۋ جۇرگىزگەن. "قازمۇنايگاز" ۇك اق ەنشىلەس كاسىپورنى "ويلترانسپورتكورپورەيشن" ءجشس-نىڭ لاۋازىمدى تۇلعالارى تاۋار جەتكىزۋشىدەن 1،5 ميلليارد تەڭگەدەن استام سوماعا باعاسىنا سايكەس كەلمەيتىن اۆتوبۋستاردى العانى انىقتالدى. ولار قۇنىن 400 ميلليون تەڭگەگە كوتەرىپ كورسەتكەن.
سونداي-اق جۇمىس ىستەمەيتىن ارنايى تەحنيكا قىزمەتتەرى ءۇشىن 110 ميلليون تەڭگە اۋدارعانى بەلگىلى بولدى. ال "West Oil Software" جشس-دە جۇمىس ىستەمەگەندەرگە 400 ميلليون تەڭگەدەن استام جالاقى تولەگەن. وسىلايشا كومپانيا باسشىلىعىنىڭ جاقىن تۋىستارىنا نەگىزسىز جالاقى ەسەپتەلىپ كەلگەن.
“قىلمىستىق كودەكستىڭ 189-بابىنىڭ 4-بولىگى “سەنىپ تاپسىرىلعان بوتەن مۇلىكتى ءىرى مولشەردە بەرۋ نەمەسە جىمقىرۋ” بويىنشا 5 سوتقا دەيىنگى تەرگەۋ باستالدى. پروسەستىك پروكۋرورلار تاعايىندالدى. سوتقا دەيىنگى تەرگەپ-تەكسەرۋ شەڭبەرىندە اتالعان ۇيىمداردىڭ 4 باسشىسى ۇستالدى. قىلمىستىق ىستەر وبلىستىق ەكونوميكالىق تەرگەۋ دەپارتامەنتىنىڭ وندىرىسىندە”، – دەپ مالىمدەدى ماڭعىستاۋ وبلىسىنىڭ پروكۋراتۋراسى.
ەسكە سالايىق، بۇعان دەيىن “West Oil Software" كومپانياسىنىڭ جۇمىسشىلارى ءبىر اي بويى ەرەۋىلگە شىققان ەدى. 2023 جىلدىڭ 11 جەلتوقسانىندا باس كوتەرگەن قىزمەتكەرلەر "قازمۇنايگاز" ۇلتتىق كومپانياسى" اق قۇرامىنا قوسىلۋدى، ءبىرىڭعاي جالاقى جۇيەسىن ەنگىزۋدى جانە ماتەريالدىق-تەحنيكالىق بازانى جاڭارتۋدى تالاپ ەتكەن.
كەيىن ماڭعىستاۋ وبلىسىنداعى "West Oil Software" ج ش س جۇمىسشىلارىنىڭ ەرەۋىلى زاڭسىز دەپ تانىلعان ەدى. ال 28 قاڭتاردا "West Oil Software" ج ش س ماڭعىستاۋ وبلىسىنداعى ەرەۋىلگە بايلانىستى 50 قىزمەتكەردى جۇمىستان شىعارعانى بەلگىلى بولدى.
پىكىر قالدىرۋ