- جۇڭگو حالىق رەسپۋبليكاسى ساۋدا مەن ينۆەستيسيا سالاسىندا قازاقستاننىڭ جەتەكشى سەرىكتەسى رەتىندەگى ورنىن ساقتاپ وتىر. 30 جىلدان اساتىن قارىم-قاتىناستىڭ ارقاسىندا قوس ەلدىڭ اراسىنداعى ساۋدا اينالىمى 100 ەسە ءوسىپ، 2023 جىلى 41 ملرد دوللارعا جەتتى. بۇل تاريحي رەكورد بولىپ ەسەپتەلەدى. وتكەن جىلدىڭ قورىتىندىسى بويىنشا جۇڭگو قازاقستانداعى ءىرى ينۆەستورلاردىڭ العاشقى تورتتىگىنە ەندى. 2023 جىلى بۇل ەل 2 ملرد دوللارعا جۋىق تىكەلەي ينۆەستيسيا سالعان. بۇل 2022 جىلدىڭ كورسەتكىشىنەن 16،4 كوپ. جالپى قازاقستان ەكونوميكاسىنداعى جۇڭگو ينۆەستيسياسىنىڭ جيىنتىق كولەمى 25 ملرد دوللاردان است-، - دەدى مەملەكەت باسشىسى.
بۇگىندە قازاقستاندا 4 700-دەي قازاق-قىتاي بىرلەسكەن كاسىپورنى جۇمىس ىستەيدى.
- بۇدان بولەك قارجى سەكتورىنداعى بىرلەسكەن قىزمەتىمىزدىڭ اياسىن كەڭەيتپەكشىمىز. ول ءۇشىن «استانا» حالىقارالىق قارجى ورتالىعىنىڭ مۇمكىندىكتەرىن پايدالانامىز. بۇگىندە بۇل ورتالىقتا 78 ەلدەن 2 800-گە جۋىق شەتەلدىك كومپانيا تىركەلگەن. ونىڭ وننان ءبىر بولىگى قىتايدان، - دەدى پرەزيدەنت.
قاسىم-جومارت توقايەۆ جۇڭگو تارابىنىڭ «ءبىر بەلدەۋ، ءبىر جول» مەگاجوباسىن تۇتاستاي قولدايتىنىن ايتتى.
- ءبىز الدىمىزعا قىتايمەن اراداعى كوپقىرلى قارىم-قاتىناستى ارى قاراي تەرەڭدەتۋ باعىتىندا ءورشىل جوسپارلار قويىپ وتىرمىز. وعان قاجەتتى العىشارتتار مەن جاعدايدىڭ ءبارىن جاساپ جاتىرمىز. ءوزارا ىقپالداستىقتىڭ قازىرگى جوعارى قارقىنىن ەسكەرسەك، اراداعى ساۋدا اينالىمىن 100 ملرد دوللارعا جەتكىزۋ تولىقتاي قول جەتكىزۋگە بولاتىن مەجە، - دەدى مەملەكەت باسشىسى.
پىكىر قالدىرۋ