جەتىسۋلىقتار، اسىرەسە تالدىقورعان قالاسىنىڭ تۇرعىندارى كوپقاباتتى ۇيلەرىنىڭ اۋلاسىن گۇلدەنگەن باققا اينالدىرۋدا، ولار ءۇيدىڭ كىرەبەرىس تۇسىنا جىل سايىن سان ءتۇرلى گۇلدەر وسىرۋدە جانە بۇل گۇلدەر قارا سۋىق تۇسكەنشە ءوڭىن بەرمەيدى.

زەينەتكەرلەردىڭ ەڭبەكقورلىعىنىڭ ارقاسىندا «سامال» شاعىن اۋدانىنداعى №11 ۇيدە وسىمدىكتەردىڭ 60-تان استام ءتۇرى ءوسىپ تۇرعان بۇل اۋلانىڭ «ۇلگىلى» اتاعىنا يە بولۋى دا عاجاپ ەمەس، ولگا سەرەبرەننيكوۆا ءار گۇلگە جان جىلۋىن، كوڭىل شۋاعىن قوسا قۇيادى.

11 جىل ىشىندە اۋەسقوي باعبان جۇزدەگەن ءتۇرلى گۇل ءوسىرىپ كەلەدى، ونىڭ ءوز تۋعان جەرى مەن ءوز قالاسىنا دەگەن سۇيىسپەنشىلىگى كوپكە ۇلگى بولىپ وتىر، مۇنداي يگى ءىس بوس جاتقان جەر ۋچاسكەسىن ءتيىمدى پايدالانساق دەگەن نيەتتەن باستالعان دەيدى.

وبلىس ورتالىعىنىڭ تاعى ءبىر تۇرعىنى ءوز اۋلاسىن كوگالداندىرۋمەن 15 جىلدان بەرى اينالىسىپ كەلەدى، ول 50 سوتىق جەرگە ۇلكەن گۇلزار جاساپ، جەمىس اعاشتارىن ءوسىرىپ وتىر، ءلاززات اسانوۆا كوشەسىندەگى № 69 كوپ قاباتتى ءۇيدىڭ اۋلاسىن گۇلدى باققا اينالدىرۋ ءۇشىن تاتيانا يبراگيموۆانىڭ قانشا تەر توككەنىن گۇلزارعا قاراعاننان-اق ۇعىنۋ قيىن ەمەس، گۇل ءوسىرۋشىنىڭ ءوزى مۇنىمەن شەكتەلمەيتىنىن ايتادى، ءوزىنىڭ تۋعان قالاسىنا دەگەن سۇيىسپەنشىلىكتىڭ ايقىن ۇلگىسىن كورسەتىپ، گۇلدىڭ جاڭا سورتتارىن وتىرعىزۋدى جالعاستىرماقشى.

جالپى تالدىقورعان قالاسى اكىمدىگىنىڭ مالىمەتىنە قاراعاندا، بيىل وبلىس ورتالىعىندا «ۇلگىلى اۋلا» بايقاۋى وتەدى، «بۇل بايقاۋدىڭ باستى ماقساتى - قالانىڭ كەسكىن-كەلبەتىن جاقسارتا ءتۇسۋ،  اۋلالاردىڭ تازا، ءارى جيناقى بولۋىن ناسيحاتتاۋ، سونداي-اق، اۋلا اۋماقتارىنىڭ سانيتارلىق جاعدايى مەن كوگالداندىرىلۋىن، اباتتاندىرىلۋىن قولعا الۋ»، - دەيدى سالا ماماندارى.