WhatsApp مەسسەندجەرىندە قازاقستانعا قىرعىزستاننان قۇتىرۋ اۋرۋىنا شالدىققان مالدىڭ ەتى اكەلىنگەنى تۋرالى اۋديوجازبا تارادى. اۋىل شارۋاشىلىعى مينيسترلىگى بۇل اقپاراتتى جوققا شىعاردى.
اۋديوجازبادا ەر ادام قىرعىزستاننان ەلىمىزگە قۇتىرۋ اۋرۋىنا شالدىققان مالدىڭ ەتى اكەلىنىپ جاتقانىن ايتقان.
قازاقستاننىڭ اۋىل شارۋاشىلىعى مينيسترلىگى مۇنىڭ جالعان ەكەنىن مالىمدەدى.
"بۇل اقپارات شىندىققا سايكەس كەلمەيدى، ويتكەنى قىرعىزستاننان ەت ونىمدەرىن اكەلۋگە شەكتەۋ ەنگىزىلگەن. بۇل شارا وسى رەسپۋبليكاداعى جانۋارلاردىڭ ءقاۋىپتى اۋرۋلارى بويىنشا قولايسىز جاعدايعا بايلانىستى قابىلداندى"، – دەلىنگەن ۆەدومستۆو جاۋابىندا.
مينيسترلىك ەتتى كونتراباندالىق جولمەن اكەلۋ فاكتىسى راستالعان جاعدايدا، قازاق-قىرعىز شەكاراسىندا باقىلاۋدى كۇشەيتۋ شارالارى قابىلداناتىنىن اتاپ ءوتتى.
پىكىر قالدىرۋ