ۇلتتىق ەكونوميكا مينيسترلىگىنىڭ اعىمداعى احۋالدى تالداۋ دەرەكتەرى بويىنشا باتىستاعى وڭىرلەر ءۇشىن سىن-تەگەۋرىن – مۇناي ءوندىرۋدىڭ تومەندەۋى جاعدايىندا ەكونوميكانى ءارتاراپتاندىرۋ.

دەگەنمەن باتىستا حالىق سانىنىڭ تۇراقتى ءوسۋى بايقالىپ وتىر. بولجامدارعا سايكەس، 2030 جىلعا دەيىن ونداعى حالىق سانى 10%-عا – 3،1 ملن-نان 3،4 ملن ادامعا دەيىن وسەدى. بۇل ءۇردىس جاڭا جۇمىس ورىندارىن قۇرۋ قاجەتتىلىگىن تۋعىزادى. 2024-2030 جىلدار كەزەڭىندە ەڭبەك نارىعىنا شامامەن 138 مىڭ ادام شىعادى دەپ بولجانادى. پرەمەر-مينيستردىڭ ورىنباسارى ولاردى جۇمىسپەن قامتاماسىز ەتۋ جونىندە ءتيىستى تاپسىرمالار بەردى.

سونىمەن قاتار كەڭەس بارىسىندا بەيىندى مينيسترلىكتەر ءوز باعىتتارى بويىنشا، ونىڭ ىشىندە وڭىرلىك ينفراقۇرىلىمدى دامىتۋ بويىنشا جۇرگىزىلىپ جاتقان جۇمىس تۋرالى ەسەپ بەردى. ونەركاسىپ جانە قۇرىلىس مينيسترلىگىنىڭ دەرەكتەرى بويىنشا 2025 جىلعا دەيىن وڭىرلەردى سۋمەن قامتاماسىز ەتۋ ماسەلەسى تولىعىمەن شەشىلەدى. قازىرگى تاڭدا كارىز-تازارتۋ قۇرىلىستارى بويىنشا جوبالار ىسكە اسىرىلىپ جاتىر.

سالالىق مينيسترلىكتەر مەن اكىمدىكتەر قابىلداپ جاتقان شارالارعا قاراماستان، وسى باعىتتاعى جۇمىستى كۇشەيتۋ قاجەتتىگى بايقالادى.

ۆيسە-پرەمەر اتاپ وتكەندەي، سۋمەن قامتاماسىز ەتۋدى، سۋ بۇرۋدى، ەلەكترمەن جانە جىلۋمەن جابدىقتاۋدى قارجىلاندىرۋ، سونداي-اق وڭىرلەردە جول سالۋ ماسەلەلەرى باسىم سيپاتقا يە بولۋى ءتيىس.

«بىزگە ورال جانە اتىراۋ قالالارىنىڭ اۋەجايلارى ءۇشىن اشىق اسپان مارتەبەسىن كەڭەيتە وتىرىپ، رەيستەر سانىن ۇلعايتۋ قاجەت. ەڭ جوعارى جۇكتەمە كەزەڭىندە ۆاگونداردىڭ ماۋسىمدىق تاپشىلىعىن جويۋ، حالىقارالىق اۋەجايلاردى، تەمىرجول ۆوكزالدارى مەن ستانسالاردى جاڭعىرتۋ قاجەت. ال اۋىلدىق جولداردىڭ ساپا دەڭگەيىن 90%-عا دەيىن جەتكىزۋ كەرەك»، — دەپ تاپسىردى ۆيسە-پرەمەر.