ءمينيستردىڭ ايتۋىنشا، جولداردىڭ ساپاسى ولاردى ۇستاۋ جاعدايىنا بايلانىستى بولادى. ەلىمىزدە رەسپۋبليكالىق ماڭىزى بار 25 مىڭ شاقىرىم جولدى ۇستاۋعا 80 ميلليارد تەڭگە قاجەت ەكەن.
"بيۋدجەتكە اۋىرلىق سالماس ءۇشىن اقىلى جولداردى ەنگىزۋ جالعاسادى. قاراجات جولداردى كۇتىپ ۇستاۋعا، اعىمداعى جوندەۋگە جانە تەحنيكا ساتىپ الۋعا باعىتتالماق. ءقازىر اقىلى جولداردا تولەمدى ۋاقىتىلى جاساماعاندارعا ايىپپۇلدى اۆتوماتتاندىرۋ پروسەسى پىسىقتالىپ جاتىر"، – دەدى مينيستر.
قارابايەۆ قايتا جوندەۋدەن وتكەن جولداردى نورماتيۆتىك دەڭگەيدە ۇستاۋ ماقساتىندا بيىل ۇزىندىعى 2 مىڭ شاقىرىم بولاتىن تاعى 11 جول ۋچاسكەسى اقىلى بولاتىنىن مالىمدەدى:
- قىزىلوردا-ارال؛
- اقتوبە-ورىنبور؛
- قوستاناي-ترويسك؛
- قوستاناي-دەنيسوۆكا؛
- اقتاۋ-بەينەۋ؛
- قاندىاعاش-ماقات؛
- بالقاش-بۋرىلبايتال؛
- بۋرىلبايتال-شۋ؛
- ءۇشارال-دوستىق؛
- قاراعاندى اينالما جولى؛
- تاراز اينالما جولى". كولىك مينيسترلىگىنىڭ باسشىسى جەرگىلىكتى جۇرگىزۋشىلەرگە جەڭىلدىكتەر قاراستىرىلاتىنىن اتاپ ءوتتى. اقىلى جولدا نەگىزگى جۇكتەمە قازاقستان ارقىلى وتەتىن ترانزيت اۆتوموبيلدەرگە باعىتتالادى. ايتا كەتەيىك، ءقازىر اقىلى جولداردىڭ جالپى ۇزىندىعى – 3،2 مىڭ شاقىرىم. وتكەن جىلى اقىلى جولدان 30 ميلليارد تەڭگە جينالعان.
