قازاقستان فۋتبول فەدەراسياسىنىڭ پرەزيدەنتى ادىلەت بارمەنقۇلوۆ ۇلتتىق قۇرامانىڭ باس باپكەرى بولىپ سايلانعان ستانيسلاۆ چەرچەسوۆ پەن وعان قازاق تىلىندە سۇراق قويعان جۋرناليستكە قاتىستى بولعان جاعدايعا پىكىر ءبىلدىردى. بۇل تۋرالى Sport24.ru پورتالى جازدى.
"ستانيسلاۆ چەرچەسوۆكە قازاق ءتىلىن ءبىلۋدىڭ قاجەتى جوق، ەڭ باستىسى — ءبىزدىڭ مەنتاليتەتىمىزدى، ءداستۇرىمىز بەن مادەنيەتىمىزدى ءتۇسىنۋ. ول قازاق تىلىندە قىسقاشا ديالوگ ورناتىپ، امانداسا الۋى ماڭىزدى ەكەنىن تۇسىنۋگە ءتيىس. چەرچەسوۆتەن ءبىزدىڭ ءتىلىمىز بەن ءداستۇرىمىزدى قۇرمەتتەۋ عانا تالاپ ەتىلەدى، ال ول ءوز كەزەگىندە قازاقستاندىق فۋتبولدى دامىتۋ ءۇشىن بارىن سالادى" - دەپ مالىمدەدى ادىلەت بارمەنقۇلوۆ.
سونداي-اق، ول چەرچەسوۆتىڭ قازاق ءتىلىن ۇيرەنۋى تۋرالى ماسەلە بولماعانىن ايتتى.
"چەرچەسوۆتىڭ قازاق ءتىلىن ۇيرەنۋى بويىنشا ەشقانداي ماسەلە جوق جانە ءبىزدىڭ جۋرناليستەر ونى قابىلدادى. مەنىڭشە، بۇل جاعدايدا بىرەۋدىكى قاتە، بىرەۋدىكى دۇرىس دەي المايمىز. ستانيسلاۆ ءسالاموۆيچتىڭ وزىندىك بولمىسى بار جانە مۇنى ءبارى جاقسى تۇسىنەدى. بىزدە "باسى قاتتى بولسا، اياعى ءتاتتى بولادى" دەگەن ءسوز بار. ءبىز، قازاقتار، بارلىعىنا قۇرمەت كورسەتەمىز"، - دەدى بارمەنقۇلوۆ.
ەسكە سالا كەتەيىك، ماگومەد ادييەۆ قازاقستان قۇراماسىنىڭ باس باپكەرلىگىنەن كەتكەننەن كەيىن ونىڭ ورنىنا ستانيسلاۆ چەرچەسوۆ تاعايىندالعان بولاتىن. كەيىن ستانيسلاۆ چەرچەسوۆ استانادا وتكەن باسپا ءسوز ءماسليحاتىندا وزىنە قازاق تىلىندە سۇراق قويعان جۋرناليستپەن ءسوز تالاستىرىپ قالعان ەدى.
پىكىر قالدىرۋ