قازاقستان رەسپۋبليكاسى پارلامەنتى سەناتىنىڭ دەپۋتاتى عالياسقار سارىبايەۆ جەتىسۋ وڭىرىنە جۇمىس ساپارى اياسىندا تالدىقورعان قالاسىنداعى قازاقستان رەسپۋبليكاسى ۇلتتىق ۇلانىنىڭ 5514 اسكەري بولىمىندە بولدى.

كەزدەسۋ بارىسىندا حالىق قالاۋلىسى اسكەري قىزمەتشىلەرمەن قاۋىپسىزدىكتى ارتتىرۋ جانە اسكەري ءبولىمدى قاجەتتى تەحنيكالىق قۇرال جابدىقتارمەن قامتاماسىز ەتۋ ماسەلەلەرىن تالقىلادى. سونداي-اق، اسكەري قىزمەتشىلەر مەن ولاردىڭ وتباسىلارىن الەۋمەتتىك قولداۋ ماسەلەسى دە قاراستىرىلدى.

سەناتور ءبولىم باسشىلىعىمەن بىرگە اسكەري ءبولىمنىڭ قىزمەتتىك-جاۋىنگەرلىك جۇمىسىمەن، قۇقىقتىق ءتارتىپ اسكەرى جاۋىنگەرلەرىنىڭ قىزمەتىمەن، ولاردىڭ تۇرمىس جاعدايىمەن تانىسىپ، تۇرعىن ءۇي-جايلاردى ارالادى. سونىمەن قاتار، اسكەري تەحنيكا، اتىس قارۋى مەن جەكە قۇرامنىڭ ارنايى قۇرال ۇلگىلەرى كورسەتىلدى.

عالياسقار سارىبايەۆ ەڭ الدىمەن ۇلاندىقتارعا ارنالعان اسكەري ءبولىمنىڭ جاڭا اۋماعىنداعى قۇرىلىس نىساندارىنىڭ سالىنۋ بارىسىمەن تانىستى. بۇگىنگى ۋاقىتتا مۇندا 3 ءتيپتى مودۋلدىك عيمارات پەن 4 كازارما بوي كوتەردى. جاقىن ارادا شتاب، كلۋب، اۆتوتۇراق، سپورت الاڭدارى جانە باسقا دا نىساندار سالۋ جوسپارلانۋدا.

ودان كەيىن 5514 اسكەري ءبولىمىنىڭ اسكەري قىزمەتشىلەرمەن اڭگىمەلەسىپ، ولاردىڭ كۇندەلىكتى تىنىس-تىرشىلىگىمەن، قىزمەت ەتۋ جاعدايلارىمەن تانىستى. سونداي-اق وقۋ جانە قىزمەتتىك مىندەتتەرىن ورىنداۋعا دايىندالاتىن جابدىقتالعان وقۋ الاڭدارى مەن وقۋ كابينەتتەرىن، اسحانا، كلۋب جانە باسقا دا نىسانداردى ارالادى.

ساپار سوڭىندا سەناتور جاس ساربازدارمەن كەزدەسۋ وتكىزىپ، ولارمەن وزەكتى ماسەلەلەر مەن تۇيتكىلدى تاقىرىپتاردى تالقىلادى. اسكەري قىزمەتكەرلەردىڭ الەۋمەتتىك قورعالۋىن ارتتىرۋ، قىزمەت ەتۋ جانە وقۋ جاعدايلارىن جاقسارتۋ، سونداي-اق كاسىبي دامۋ مەن مانساپتىق ءوسۋ ماسەلەلەرى سياقتى وزەكتى تاقىرىپتار قوزعالدى.

اڭگىمە بارىسىندا عالياسقار سارىبايەۆ ۇلاندارعا ەلىمىزدىڭ تىنىشتىعىن قامتاماسىز ەتۋدەگى اتقارىپ جۇرگەن قىزمەتتەرىنە زور العىسىن ءبىلدىردى. ول اسكەري قىزمەتشىلەردىڭ ايماقتاعى قاۋىپسىزدىك پەن تۇراقتىلىقتى قامتاماسىز ەتۋدەگى ءرولىنىڭ ماڭىزدىلىعىن تىلگە تيەك ەتتى.

سەنات دەپۋتاتىمەن كەزدەسۋ جاس ساربازدار ءۇشىن وزەكتى ماسەلەلەردى تالقىلاۋ مۇمكىندىگى عانا ەمەس، سونىمەن قاتار ودان ءارى قىزمەت ەتۋگە ىنتالاندىرۋ بولدى. جاس ساربازدار اسكەر ومىرىنە نازار اۋدارعانى ءۇشىن ريزاشىلىقتارىن ءبىلدىرىپ، ءوز ەلىنە ادال جانە ابىرويلى قىزمەت ەتۋگە ۋادە بەردى.

قازاقستان رەسپۋبليكاسىنىڭ سەناتى دەپۋتاتىنىڭ قۇقىقتىق ءتارتىپ اسكەرىنە ارنايى ىس-ساپارمەن كەلۋى ەلدىڭ قورعانىسى مەن قاۋىپسىزدىگى ماسەلەلەرىنە اسا كوڭىل ءبولۋ كەرەكتىگىن، سونداي-اق اسكەري قىزمەتشىلەردى قولداۋعا جانە كومەكتەسۋگە دايىن ەكەنىن كورسەتتى. بۇل قازاقستان رەسپۋبليكاسىنداعى اسكەري-ساياسي تۇراقتىلىقتى نىعايتۋ جولىنداعى ماڭىزدى قادام.

قازاقستان رەسپۋبليكاسى ۇلتتىق ۇلانى «وڭتۇستىك» وڭىرلىك قولباسشىلىعىنىڭ باسپا ءسوز قىزمەتى