2024 جىلى 104 مىڭنان استام تالاپكەر ءبىلىم گرانتى كونكۋرسىنا ءوتىنىش بەردى. بۇل تۋرالى عىلىم جانە جوعارى ءبىلىم مينيسترلىگى حابارلادى.
بيىلعى وقۋ جىلىندا باكالاۆرياتقا ءتۇسۋ ءۇشىن 79 مىڭعا جۋىق گرانت ءبولىنىپ وتىر. گرانتتاردىڭ باسىم بولىگى ينجەنەرلىك جانە تەحنيكالىق باعىتتارعا بولىنگەن. بيىل العاش رەت ءىشىنارا وقۋ اقىسى بار سارالانعان گرانتتار ەنگىزىلدى. ال "پەداگوگيكالىق عىلىمدار" جانە "الەۋمەتتىك عىلىمدار، جۋرناليستيكا جانە اقپارات" باعىتتارى بويىنشا 150 سارالانعان گرانتتان بولىنگەن.
"ەڭ كوپ تاڭدالعان قالا – الماتى، 42 مىڭ بالا وڭتۇستىك استانامىزدى ستۋدەنتتىك شاق وتكىزۋ ءۇشىن تاڭداعان. ەلوردانىڭ وقۋ ورىندارىندا وقۋ ءۇشىن 22 مىڭ ءوتىنىش قابىلدانسا، 6،5 مىڭ ادام شىمكەنت ۋنيۆەرسيتەتتەرىندە وقۋعا نيەت بىلدىرگەن"- دەپ حابارلادى مينيسترلىك.
بىرنەشە جىل قاتارىنان تالاپكەرلەر "پەداگوگيكالىق عىلىمدار"، "ينجەنەرلىك، وڭدەۋ جانە قۇرىلىس سالالارى" جانە "اقپاراتتىق-كوممۋنيكاسيالىق تەحنولوگيالار" سياقتى باعىتتارعا باسىمدىق بەرىپ كەلەدى.
سونىمەن قاتار، "سەرپىن" باعدارلاماسى ارقىلى 3 903 گرانت بولىنگەن.
پىكىر قالدىرۋ