توتەنشە جاعدايلار ۆيسە-مينيسترى باۋىرجان سىزدىقبايەۆ بۇل ءۇشىن جاۋاپكەرشىلىك قاراستىرىلعانىن ايتتى.

"توتەنشە جاعداي تاڭعى 4:10-دا بولدى، ءبىراق حابارلاما بىزگە ەكى ساعاتتان كەيىن، ياعني 6.08-دە كەلدى. ازاماتتىق قورعاۋ تۋرالى رەسپۋبليكالىق زاڭناماعا سايكەس، بۇعان جول بەرۋگە بولمايدى جانە بۇل ءۇشىن زاڭ بويىنشا جاۋاپكەرشىلىككە تارتىلادى"، – دەدى سىزدىقبايەۆ ۇكىمەت بريفينگىندە.

وسى بويىنشا 200 اەك (738 مىڭ تەڭگە) ايىپپۇل سالىندى، سونداي-اق ءقازىر ءىس سوتتا. سىزدىقبايەۆ زاۋىت ءوز اۋماعىنا قۇتقارۋشىلاردى كىرگىزبەگەنىن راستادى.

"ۋچاسكەدە وزدەرىنىڭ قۇتقارۋ بولىمشەلەرى بار جانە ولار ءوز بەتتەرىمەن ءورتتى وشىرەتىندەرىنە سەنىمدى بولعان. ءبىراق مۇندا شاقىرتۋ كەلىپ تۇسكەندىكتەن، ءبىزدىڭ قۇتقارۋشىلار كەلدى، سول ءۇشىن ولاردى كىرگىزۋى كەرەك ەدى"، – دەدى ۆيسە-مينيستر.

سىزدىقبايەۆتىڭ سوزىنشە، قۇتقارۋشىلاردى كىرگىزبەي قويۋعا ەشكىمنىڭ قۇقىعى جوق.

ەسكە سالايىق، 20 شىلدەدە قاراعاندى فەرروقورىتپا زاۋىتىندا توتەنشە جاعداي بولىپ، 8 جۇمىسشى ءارتۇرلى دارەجەدە جاراقات العانىن جازعان ەدىك. كەيىنگى ءۇش كۇندە زارداپ شەككەن 8 قىزمەتكەردىڭ تورتەۋى اۋرۋحانادا كوز جۇمدى. اتالعان دەرەك بويىنشا قىلمىستىق ءىس قوزعالىپ، ارنايى كوميسسيا دا قۇرىلعان. 

فەرروقورىتپا زاۋىتىنا تيەسىلى “YDD Corporation” كومپانياسى قايتىس بولعان 4 جۇمىسشىنىڭ وتباسىنا قولداۋ كورسەتىپ، كومەكتەسەتىنىن مالىمدەدى. كومپانيا جەرلەۋ ءراسىمىن ۇيىمداستىرۋ، اس وتكىزۋ جانە مازار سالۋ بويىنشا بارلىق شىعىندى ءوز موينىنا الادى.