بۇگىن الماتىدا قازاقستان مۇسىلماندارى ءدىني باسقارماسى ءمۇفتيات جانىنان يسلام عىلىمي-زەرتتەۋ ينستيتۋتى اشىلدى. اتالعان ءىس-شاراعا زيالى قاۋىم، اتاپ ايتقاندا جازۋشى، قازاقستاننىڭ ەڭبەك سىڭىرگەن قايراتكەرى سماعۇل ەلۋباي، اكادەميك، قوعام قايراتكەرى اسقار جۇمادىلدايەۆ، پروفەسسور مارات توقاشبايەۆ، ءدىن وكىلدەرى، يمامدار جانە ب ا ق وكىلدەرى قاتىستى.
العاشقى قۇتتىقتاۋ ءسوزدى باس ءمۇفتي ناۋرىزباي قاجى تاعان ۇلى الىپ، عىلىمي-زەرتتەۋ ينستيتۋتىنىڭ ماڭىزىنا توقتالدى. اكادەميك ا.جۇمادىلدايەۆ يسلام ءدىنى مەن عىلىمدى ءبولىپ قاراستىرۋعا بولمايتىنىن، الەم مويىنداعان عۇلامالاردىڭ كوبى مۇسىلمان ەكەنىن ايتىپ، تاريحتان سىر شەرتتى. جازۋشى س.ەلۋباي ينستيتۋتتىڭ اشىلۋىنا قولداۋ ءبىلدىرىپ، قۇتتىقتاۋ ءسوز سويلەدى.
يسلام عىلىمي-زەرتتەۋ ينستيتۋتىنا يسلامتانۋشى عالىم، فيلولوگيا عىلىمىنىڭ كانديداتى، دوسەنت ءتورالى قىدىر تاعايىندالدى. ناۋرىزباي قاجى تاعان ۇلى ينستيتۋت ديرەكتورىنا كولىك تابىستادى.
اتالعان ءىس-شاراعا احمەت بايتۇرسىن ۇلى اتىنداعى ءتىل ءبىلىمى ينستيتۋتىنىڭ سىرتقى بايلانىستار جونىندەگى مەنەدجەرى ماديار قازىبەك قاتىسىپ، ينستيتۋت ۇجىمىنىڭ قۇتتىقتاۋىن جەتكىزدى جانە يسلام عىلىمي-زەرتتەۋ ينستيتۋتىنىڭ كىتاپحانا قورىنا كىتاپتار تابىس ەتتى.
پىكىر قالدىرۋ