عىلىم جانە جوعارى ءبىلىم مينيسترلىگى 2024-2025 وقۋ جىلىنا جەرگىلىكتى اتقارۋشى ورگانداردان كونكۋرستىق نەگىزدە مەملەكەتتىك ءبىلىم بەرۋ گرانتىنا وتىنىشتەردى قابىلداۋ باستالعانىن حابارلادى.
مينيسترلىك مالىمەتىنشە، بيىل جەرگىلىكتى اتقارۋشى ورگاندار 2475 ءبىلىم بەرۋ گرانتىن بولگەن.
"اتاپ وتەتىن بولساق، 858 گرانتتى ەلوردا اكىمدىگى ءبولىپ وتىر. بۇل – اكىمدىكتەر اراسىنداعى ەڭ ۇلكەن كورسەتكىش. ودان كەيىنگى ورىندا شىعىس قازاقستان وبلىسى – 270 گرانت، اباي وبلىسى – 200 گرانت، ماڭعىستاۋ وبلىسى – 175 گرانت، اقمولا وبلىسى – 160 گرانت جانە جەتىسۋ مەن قىزىلوردا وبلىسى – 100 گرانت، قالعان ايماقتار 100-دەن از گرانت بولگەن" دەلىنگەن مينيسترلىك حابارلاماسىندا.
ءبىلىم بەرۋ گرانتىن تاعايىنداۋ كونكۋرسىنا قاتىسۋ ءۇشىن ۇمىتكەر جوعارى وقۋ ورىندارىنىڭ قابىلداۋ كوميسسياسىنا ءوتىنىش بەرۋ قاجەت.
سونداي-اق جوو-عا؛
- ءبىلىمى تۋرالى قۇجات؛
- ۇبت سەرتيفيكاتىن؛
- جەكە باسىن كۋالاندىراتىن قۇجاتتىڭ كوشىرمەسىن؛
- جەڭىلدىك ساناتىن راستايتىن قۇجاتتاردى (بار بولعان جاعدايدا) تاپسىرادى.
قۇجاتتاردى قابىلداۋ مەرزىمى تۋرالى اقپاراتتى اكىمدىكتەردەن، سونداي-اق جوعارى وقۋ ورىندارىنىڭ قابىلداۋ كوميسسيالارىنان الۋعا بولادى. گرانت بەرۋ تۋرالى شەشىمدى اكىمدىك جانىنان قۇرىلعان ارنايى كوميسسيا قابىلدايدى. جوعارى وقۋ ورىندارىنا قابىلداۋ 25 تامىزدا اياقتالادى.
پىكىر قالدىرۋ