جۋىردا ەربايان مۇحتار اتا-اناسىنىڭ تالابىمەن ۇيىنە شىعارىلدى. ساربازدىڭ تۋىستارى جەكە دارىگەرلەردىڭ اقىسىن تولەي الماي قازاقستاندىقتاردان كومەك سۇراعان ەدى. بلوگەر لولا يزرايلوۆا ساربازدىڭ وتباسىنىڭ رەسمي وكىلى رەتىندە ەربايان مۇحتاردىڭ جاعدايى تۋرالى حابار تاراتىپ ءجۇر. ول ەرباياننىڭ تۋىستارىنىڭ قازاقستاندىقتاردىڭ كومەگىنەن كەيىن كوزىنە جاس العانىن ايتتى.

"ەرباياننىڭ وتباسى بۇكىل قازاقستان حالقىنا جانە ەمدەلۋگە قاراجات جيناۋعا كومەكتەسكەن باسقا ەلدەردىڭ ازاماتتارىنا شەكسىز العىسىن بىلدىرەدى. اتا-اناسى كوز جاسىنا ەرىك بەردى، مۇنداي كەرەمەت قولداۋ بۇكىل ۇجىمدى تاڭعالدىردى. ءسوزىمىز جوق. مەملەكەت تالاي ايدىڭ ىشىندە جاساي الماعان ءىستى ساناۋلى كۇندە جاسادىڭىزدار. مەن قازاقستاندا تۇراتىنىمدى ماقتان تۇتامىن"، — دەپ جازدى بلوگەر. سونداي-اق بلوگەر ەرباياننىڭ وتباسى اقشا جيناۋدى جالعاستىرۋ كەرەك پە، جوق پا دەگەن ماسەلەنى ويلانىپ جاتقانىن ايتتى.

"ويتكەنى ءبىزدى سانيتارلىق اۆياسيانىڭ 25 000 000 تەڭگەدەن 60 000 000 تەڭگەگە دەيىن تۇراتىنى قورقىتادى. ەمدەۋ قانشا ايعا سوزىلاتىنى، ەمحانا قانشا تولەيتىنى بەلگىسىز. ادامدار مەديسيناسى دامىعان ەلدەرگە ۇشۋعا كەڭەس بەرەدى. ال بۇل، تيىسىنشە، ءبىز ويلاعاننان الدەقايدا قىمباتقا تۇسەدى"، – دەيدى بلوگەر. قارجى جيناۋ 1 ماۋسىمدا باستالعان. ول كەزدە تۇركيادا ەمدەلۋ ءۇشىن 30 ميلليون تەڭگە قاجەت ەكەنى ايتىلعان. ءبىراق، ەڭ اۋەلى، جاس جىگىتكە وڭالتۋ شارالارى قاجەت.