«ازاماتتارعا ءتيىستى ۋچاسكەلىك كوميسسيالاردىڭ ءۇي-جايلارىندا تىزىمدەرمەن تانىسۋ، سونداي-اق ولارعا ەنگىزىلگەن وزدەرى تۋرالى دەرەكتەردىڭ دۇرىستىعىن تەكسەرۋ مۇمكىندىگى قامتاماسىز ەتىلەدى. رەفەرەندۋم كوميسسيالارى مۇشەلەرىن وقىتۋ سەمينارلارى ۇيىمداستىرىلاتىن بولادى. رەسپۋبليكالىق رەفەرەندۋمعا قاتىسۋعا قۇقىعى بار ازاماتتاردىڭ تىزىمدەرىن ءتيىستى جەرگىلىكتى اكىمدىكتەر داۋىس بەرۋگە ارنالعان ناقتى ۋچاسكەنىڭ اۋماعىنداعى تۇرعىلىقتى جەرى بويىنشا تىركەۋ نەگىزىندە جاسايدى»، -دەپ حابارلادى وبلىستىق اۋماقتىق كوميسسيا.
اۋماقتىق كوميسسيانىڭ مالىمەتىنە سۇيەنسەك، وبلىستاعى اۋرۋحانالار مەن اسكەري بولىمشەلەردە، ۋاقىتشا ۇستاۋ يزولياتورىندا 11 جابىق ۋچاسكە جۇمىس ىستەيدى. وبلىستا بيىلعى 1 شىلدەدەگى مالىمەتكە سايكەس رەسپۋبليكالىق رەفەرەندۋمعا قاتىسۋعا قۇقىعى بار 391 937 ازامات تىركەلگەن.
«ازاماتتاردىڭ تۇرعىلىقتى جەرى رەتىندە تۇراقتى تىركەۋ ورنى ەسەپتەلەدى. ۋاقىتشا تىركەلگەن ازاماتتار تىزىمگە وزدەرى بەرگەن ءوتىنىش نەگىزىندە عانا ەنگىزىلۋى مۇمكىن. رەفەرەندۋم وتكىزۋدى ۇيىمداستىرۋ كەزەڭىندە جەرگىلىكتى اتقارۋشى ورگاندارعا ازاماتتاردى ۋچاسكەدەگى ازاماتتار تىزىمىنە ەنگىزۋ تۋرالى حاباردار ەتۋ ءۇشىن ونلاين سەرۆيستەر، Call-ورتالىقتار، ينتەرنەت-رەسۋرستار ۇيىمداستىرۋ ۇسىنىلدى»، -دەپ ءمالىم ەتتى وبلىستىق اۋماقتىق كوميسسيادان.
ەسكە سالا كەتەلىك، بۇدان بۇرىن پرەزيدەنت رەسپۋبليكالىق رەفەرەندۋم وتكiزۋ تۋرالى جارلىققا قول قويعان ەدى.
پىكىر قالدىرۋ