ۇكىمەت وتىرىسىندا پرەمەر-مينيستردىڭ ورىنباسارى قانات بوزىمبايەۆ كوممۋنالدىق قىزمەتتەردى تۇتىنۋ نورمالارى تۇتىنۋشىلار ءۇشىن جىل سوڭىنا دەيىن ازىرلەنەتىنىن جەتكىزدى. 

ەنەرگەتيكا مينيسترلىگىنىڭ مالىمەتىنشە، جىلىتۋ ماۋسىمىنا دايىندىق الدىن الا باستالعان. الايدا بۇگىنگى تاڭدا جەو-نىڭ ورتاشا توزۋ دەڭگەيى ەل بويىنشا 65%-دى قۇرايدى. بۇل وتكەن جىلمەن سالىستىرعاندا 2% جاقسارعان. 

“ەل بويىنشا ۇلكەن ماسەلە تۋدىرىپ تۇرعان جەو جوق. تەمىرتاۋ، جەزقازعان، كەنتاۋ، ريددەر جانە ەكىباستۇز جەو-عا ەنەرگەتيكا مينيسترلىگى، اكىمدىكتەر تاراپىنان جىلۋ بەرۋ ماۋسىمىنا دايىنداۋعا اسا نازار اۋدارىلعان”، – دەدى ق ر ەنەرگەتيكا مينيسترلىگى اتوم جانە ەنەرگەتيكالىق قاداعالاۋ جانە باقىلاۋ كوميتەتى ءتوراعاسىنىڭ ورىنباسارى يليا روجكوۆ.

2022 جىلى ەكىباستۇز جەو-نا بولعان ءىرى اپاتتان كەيىن مەملەكەت باسشىسى پروبلەمالىق ەنەرگيا اكتيۆتەرىن مەملەكەت مەنشىگىنە قايتارۋ ماسەلەسىن قاراۋدى تاپسىرعان بولاتىن. ءقازىر ەكىباستۇز، ريددەر، اقتاۋ جانە ماڭعىستاۋ وبلىستارىنداعى جەو كوممۋنالدىق مەنشىكتە. ازىرگە ەكىباستۇز جەو-نى جوندەۋگە ۇكىمەت رەزەرۆىنەن 30 ميلليارد تەڭگەدەن استام قاراجات بولىنگەن.

“ۇكىمەت رەزەرۆى ەسەبىنەن 15 قازاندىققا، سونداي-اق "سامۇرىقەنەرگو" قاراجاتى ەسەبىنەن 12 قازاندىققا جوندەۋ جۇمىستارى جۇرگىزىلۋدە. جۇمىس كەستەگە سايكەس، ارتتا قالماي ۇلگەرۋدەمىز”، – دەدى ەكىباستۇز قالاسى اكىمىنىڭ ورىنباسارى ەرجان سالحانوۆ.

ال سينوپتيكتەر قىستا، اسىرەسە ەلدىڭ سولتۇستىك جانە شىعىس ايماقتارىندا تۇراقسىز جانە جەلدى اۋا-رايىن بولجاۋدا.