ىشكى ىستەر ءمينيسترى كيبەرقىلمىسقا قارسى كۇرەس ءبولىنىسىنىڭ قىزمەتكەرلەرى الماتى قالاسىندا ءتورت call-ورتالىقتى جويدى، – دەپ حابارلادى Polisia.kz.

مينيسترلىك مالىمەتىنشە، ينتەرنەت-الاياقتار شەتەلگە، سونىڭ ىشىندە يران، ءۇندىستان، جۇڭگو، اقش جانە مالايزيا ازاماتتارىنا قوڭىراۋ شالىپ، ولارعا “جوق” ينۆەستيسيالىق مامىلەلەر جاساۋدى ۇسىنعان.

47 شەتەل ازاماتى، سونداي-اق قازاقستاننىڭ 5 ازاماتى ۇستالدى. ولار شەتەل ازاماتتارىنا 2 مىڭنان استام قوڭىراۋ شالعانى انىقتالدى. ءتىنتۋ بارىسىندا 1،5 مىڭنان استام تەلەفون، 57 نوۋتبۋك پەن كومپيۋتەر، مىڭنان استام sim-كارتا تاركىلەنگەن. قازىرگى ۋاقىتتا ۇستالعانداردىڭ قازاقستاندىقتارعا قاتىستى ينتەرنەت-الاياقتىق جاساۋعا قاتىسى بار-جوعى تەكسەرىلىپ، تەرگەۋ امالدارى جالعاسىپ جاتىر.

ءىىم رەسمي وكىلى شىڭعىس الەكەشيەۆ الاياقتاردىڭ قۇربانى بولماس ءۇشىن ازاماتتاردى قىراعى بولىپ، تومەندەگىدەي جاعدايلارعا نازار اۋدارۋعا شاقىرادى:

♦سىزگە مەسسەندجەرلەر مەن الەۋمەتتىك جەلىلەردە جىبەرىلەتىن كۇماندى سىلتەمەلەرگە وتپەڭىز. ەگەر سىلتەمە بويىنشا ءوتىپ قويساڭىز، وندا مەسسەندجەرىڭىزدى قوسىلىپ تۇرعان باسقا قۇرىلعىلاردان اجىراتىڭىز.

♦ بەيتانىس ابونەنتتەردىڭ بەينەقوڭىراۋلارىنا جاۋاپ بەرمەڭىز.

♦ ەگەر بىرەۋ تەلەفون ارقىلى نەسيە رەسىمدەۋدى، مۇلىكتى ساتۋدى نەمەسە اقشانى “ءقاۋىپسىز” شوتقا اۋدارۋدى ۇسىنسا – سەنبەڭىز. قۇقىق قورعاۋ ورگاندارى مەن بانك قىزمەتكەرلەرى مۇنداي وپەراسيالاردى ەشقاشان تەلەفون ارقىلى جۇرگىزبەيدى.

♦جەكە دەرەكتەرىڭىزدى، بانك كارتاسىنىڭ جارامدىلىق مەرزىمىن، CVV-كودىن ەشكىمگە بەرمەڭىز.

♦كۇماندى ينۆەستيسيالىق جوبالارعا اقشا سالماڭىز. ينۆەستيسيا جاساماس بۇرىن قور نارىعىن جانە جوبانىڭ ءوزىن مۇقيات تەكسەرۋ قاجەت.

♦تەلەفونىڭىزعا قوسىمشالاردى ورناتۋ ءۇشىن تەك رەسمي AppStore جانە PlayMarket پلاتفورمالارىن پايدالانىڭىز.