قۇقىق قورعاۋشى جاسلان ايماعانبەتوۆ Instagram پاراقشاسىندا جوعارعى سوت وبلىستىق سوتتىڭ شەشىمىن بۇزىپ تاستاعانىن ايتتى.

"جوعارعى سوت قىزداردىڭ مەكتەپتە ورامال تاققانىنا بايلانىستى بالالاردىڭ ءبىلىم الۋ قۇقىعى مەن ورامال ماسەلەسىنە نۇكتە قويدى. جوعارعى سوتى وبلىستىق سوتتىڭ شەشىمىن بۇزىپ، وقۋشىنىڭ ورامالىنا بايلانىستى شەكتەۋلەر ءبىلىم الۋ قۇقىعىن بۇزادى دەپ تانىدى. بالالاردىڭ قۇقىقتارىن قورعاۋعا بىرنەشە زاڭگەر مەن بەلسەندىلەر قاتىستى"، – دەيدى قۇقىق قورعاۋشى.

ونىڭ ايتۋىنشا، مۇنداي شەشىمدەردى بۇعان دەيىن ءتورت وبلىستىڭ سوتتارى دا مويىنداعان.

"مينيسترلىك ورامالمەن كۇرەسىپ جاتقاندا، قازاقستاندا بالالار اراسىنداعى سۋيسيد پەن زورلىق-زومبىلىق كوبەيىپ كەتتى، بۇل وتە وكىنىشتى. قالاي بولعاندا دا، سوت بيلىگى مينيسترلىكتىڭ ۇستانىمىنا ەمەس، زاڭ نورمالارىنا قارايتىنى جاقسى"، – دەدى ول.

قۇقىق قورعاۋشىنىڭ جازباسى جەلىدە داۋ تۋدىردى. بىرەۋلەر جوعارعى سوتتىڭ شەشىمىن قولداسا، ەندى بىرەۋلەرى قىزدار وسكەنشە ورامال تاقپاۋى كەرەك دەپ ەسەپتەيدى.

"بالاعا مەكتەپتە ورامال تاعىپ قاجەت ەمەس دەپ ويلايمىن. ءقازىر بالالار وتە قاتىگەز، ولار مۇنى مازاق قىلۋى مۇمكىن. ەكىنشىدەن، بۇل قىزدىڭ ەمەس، اتا-اناسىنىڭ قالاۋى. قىز ءوسسىن، ورامال تاعا ما، جوق پا، ءوزى شەشەدى”، – دەدى جەلى قولدانۋشىسى.

تاعى ءبىر قولدانۋشىسى بالانىڭ ەسەيگەنىن كۇتپەي، كوزقاراسىن قالىپتاستىرا بەرۋ كەرەك دەپ سانايدى.

وقۋ-اعارتۋ ءمينيسترى عاني بەيسەمبايەۆ ءبىلىم وشاقتارىندا بارلىق وقۋشىنىڭ مەكتەپ فورماسىن كيۋى ماڭىزدى ەكەنىن ايتقان. ءبىلىم سالاسىنا قاتىستى ماسەلەلەردى باسقا اسپەكتىلەرمەن شاتاستىرماۋ كەرەگىن ءتۇسىندىردى.

Egov.kz مەملەكەتتىك پورتالى مەكتەپ قابىرعاسىندا حيدجاب كيۋگە تىيىم سالۋ ەشبىر دىنگە باسىمدىق بەرمەي، زايىرلىلىق قاعيداتتارىنپ، ىشكى ءتارتىبىن ساقتاۋ ءۇشىن ەنگىزىلگەنىن حابارلايدى.

بۇعان دەيىن باس ءمۇفتي ناۋرىزباي قاجى تاعان ۇلى ورامالدى قىزداردىڭ تاڭداۋىن قۇرمەتتەپ، ولاردى شەكتەمەۋ كەرەگىن ايتتى.