ۆەدومستۆو ملمەتىنە قاراعاندا، رەسەي اسكەرى ۋكراينانىڭ دونەسك وبلىسى پوكروۆسك اۋدانى نيكولايەۆكا جانە سۋحوي يار اۋىلدارىنا جاقىن ماڭدا 16 ۋكراين تۇتقىنىن اتىپ ولتىرگەن.

تەلەگرام-ارنادا تاراعان ۆيدەودا تۇتقىنعا الىنعان ۋكراين جاۋىنگەرلەرىنىڭ ورماننان اشىقتاۋ جەرگە شىققانى كورىنەدى. ولار ساپقا تۇرعاننان كەيىن رەسەي اسكەرى ولارعا وق جاۋدىرادى.

حالىقارالىق گۋمانيتارلىق قۇقىققا سايكەس، تۇتقىنعا بەرىلگەن ادامداردى اتۋ اسكەري قىلمىس بولىپ سانالادى. 

"بۇل مايدان شەبىندە ۋكراينا اسكەرىن دارعا اسقان وقيعالاردىڭ ەڭ ءىرىسى. بۇل تۇتقىنداردى ءولتىرۋ مەن ازاپتاۋ كەزدەيسوقتىق ەمەس، اسكەري-ساياسي باسشىلىقتىڭ قاساقانا ساياساتى ەكەندىگىنىڭ تاعى ءبىر دالەلى" دەدى ۋكراينانىڭ باس پروكۋرورى اندرەي كوستين.

ۋكراينا جوعارعى راداسىنىڭ ادام قۇقىعى جونىندەگى ۋاكىلى دميتريي لۋبينەس بۇۇ مەن حالىقارالىق قىزىل كرەست ۇيىمىنا اسكەري تۇتقىندارمەن قارىم-قاتىناس تۋرالى جەنيەۆا كونۆەنسياسىنىڭ بۇزىلۋىنا بايلانىستى شاعىم تۇسىرگەنىن حابارلادى.

قىركۇيەك ايىندا CNN تەلەارناسى تۇتقىنعا بەرىلگەن ۋكراين جاۋىنگەرلەرىن رەسەي اسكەرىنىڭ ءولتىرىپ جاتقانى تۋرالى ەكى ۆيدەو جاريالاعان. ۆيدەو دروننان تۇسىرگەن، ۋكراينانىڭ بارلاۋ قىزمەتى ۆيدەونى CNN ارناسىنا جىبەرىپ، سولداتتى ءولتىرۋ تۋرالى بۇيرىقتىڭ ءاۋديوماتىنىن بەرگەن.

ۋكراينا باس پروكۋرورى CNN ارناسىنا ۆەدومستۆو سوعىس باستالعالى بەرى كەمىندە 28 ۋكراينالىق تۇتقىننىڭ قازاسىن تەرگەپ جاتقانىن حابارلاعان.

رەسەي مۇنداي ايىپتاۋلارعا تۇسىنىكتەمە بەرمەيدى.

جۋىردا بۇۇ ادام قۇقىعى جونىندەگى باقىلاۋ ميسسياسى كەزەكتى ەسەبىن جاريالاپ، ۋكراين تۇتقىندارىن قورلاۋ جۇيەلى تۇردە بولىپ تۇراتىنىن ايتقان.

بايانداما اۆتورلارى ازاپتاۋ ناتيجەسىندە نەمەسە مەديسينالىق كومەك بەرىلمەگەندىكتەن ون ۋكراين تۇتقىنىنىڭ قازا بولعانىن تىركەگەن. ەسەپتە ۋكراين تۇتقىندارىن ۇرىپ-سوعۋ، ەلەكتر توعىنا سوقتىرۋ، تۇنشىقتىرۋ، ۇيىقتاتپاۋ، اتۋ يميتاسياسى، ار-نامىسىنا تيۋ، وتباسىنا كۇش كورسەتەتىنى تۋرالى قوقان-لوقى جاساۋ سياقتى "ادىستەر" ءجيى كەزدەسەتىنى ايتىلادى.